Ինչո՞ւ Գյումրեցին չի վստահում եւ չի հավատում ՀՀԿ-ին

«Ստեղծելու ենք մի կառույց, որտեղ Շիրակի եւ Գյումրու գործարարները կներկայացնեն իրենց բիզնես ծրագրերը»,- սա եւս գյումրեցիներին տվածՀՀԿ-ի խոստումներից է: Ընդ որում՝ ընդամենը 2015-ին, սահմանադրական հանրաքվեից առաջ:

2015 թվականի դեկտեմբերի 6-ին կայանալիք հանրաքվեից առաջ ՀՀԿ վերնախավը հիշեց Գյումրին ու գյումրեցիներին, եւ մի քանի անգամ «մտահոգվեց» նրանց խնդիրներով: Գյումրեցիներին սիրաշահելու համար ՀՀԿ-ն այն ժամանակվա վարչապետ Հովիկ Աբրահամյանին երեք անգամ գործուղեցին Գյումրի:

2015-ին ՀՀԿ առաջնորդները գյումրեցիներին տեքստիլ արդյունաբերության ոլորտում 300, իսկ մի քանի ամիս անց՝ 400 աշխատատեղ խոստացավ: 2015-ը անցավ. Գյումրու 46 տոկոս աղքատությունը նույնիսկ զրո ամբողջ հարյուրերորդականով չնվազեց:

Արդեն 2016-ին, կրկին Գյումրիում, լրագրողները հիշեցրեցին 400 դարձած 300 աշխատատեղի մասին: Այս անգամ ՀՀԿ առաջնորդները խոստացան՝ տեքստիլ արդյունաբերությունում 500 հոգի կաշխատի:

Գյումրիում արդեն 2017 թվականն է, իսկ գործազուրկների թիվը՝ նույնը:
Միանգամայն պարզ էր, որ հանրաքվեից առաջ Սերժ Սարգսյանը ցանկանում էր ընդդիմադիր համարվող Գյումրիում ձայներ «խփել» իր համար: Հարկ է նշել, որ նախորդ ընտրությունների նման՝ Սերժ Սարգսյանը Գյումրիում այս անգամ էլ պարտվեց:

Պարտվեց, որովհետեւ գյումրեցին չի հավատում եւ չի ընտրում Սերժ Սարգսյանի կամ ՀՀԿ-ական այլ թեկնածուների, քանի որ ձեռքին ունի ՀՀԿ-ի կեղծ խոստումների մի ամբողջ փաթեթ:

Առաջիկա խորհրդարանական ընտրություններին գյումրեցին կրկին չի ընտրելու Սերժ Սարգսյանի շրջանառության մեջ դրած թեկնածուներին: ՀՀԿ-ի նախկինում տված խոստումները հիշելով եւ նրա ներկա կարգավիճակը հաշվի առնելով՝ գյումրեցին գիտակցում է, որ Սերժ Սարգսյանը իր անձնական շահերի համար օգտագործում է ոչ միայն շարքային քաղաքացիներին, այլեւ այս ու այն պաշտոնյաներին, այդ թվում եւ վարչապետներին:

Քաղաքական այս խմորումներում մի բան հստակ է. գյումրեցի ընտրողն այլեւս չի հավատում ՀՀԿ-ի հեքիաթային խոստումներին: Այս քաղաքում դադարել են նույնիսկ լսել նախընտական զավեշտները: ԱԺ ընտրություններին գյումրեցին վճռական է տրամադրված. ցանկանում է տեսնել Սերժ Սարգսյանի պարտությունը՝ հիմնովին: Գյումրեցին հոգնել է եւ ՀՀԿ-ից եւ այս կուսակցության տված կեղծ խոստումներից:

«Լավ, զարմանում եմ, մի՞թե չեն հասկանում, որ իրենցից հոգնել ենք, իրենց չենք վստահում, չենք ընտրելու ՀՀԿ-ին, ինչո՞ւ են այսքան փող թափում»,- մեզ հետ զրույցում ասաց գյումրեցի տաքսիստներից մեկը, որը միայն մտածում էր, թե ընդդիմադիր ուժերից ում է ճիշտ ձայն տալ:

Դավիթ Գասպարյան

Գյումրի

սկիզբը  այստեղ

Այս թեմայով Գյումրին՝ Նյու Վասյուկի կամ Իլֆն ու Պետրովը կնախանձեին ՀՀԿ-ին