Զբոսաշրջիկների թիվն աճում է՝ ծախսերը՝ նույնպես 

Հայաստան այցելող զբոսաշրջիկների թիվը շարունակում է աճել: Այդ մասին են վկայում վիճակագրական կոմիտեի կողմից հրապարակած տվյալները։ Ըստ տվյալների, 2026 թվականի առաջին վեց ամիսներին մեր երկիր է այցելել  1 մլն 41 հազար 598 զբոսաշրջիկ՝ նախորդ տարվա նույն ժամանակահատվածի 907 հազար 135-ի համեմատությամբ։ Այսպիսով՝ աճը կազմել է 14.8 տոկոս, կամ 134 հազար 463 զբոսաշրջիկ։

Միաժամանակ աճում են նաև զբոսաշրջիկների համար կարևոր մի շարք ծառայությունների գները։ Վիճակագրական կոմիտեի տվյալների համաձայն՝ 2026 թվականի հուլիսին «Ռեստորաններ և հյուրանոցներ» խմբում գները նախորդ տարվա նույն ամսվա համեմատ աճել են 4.9 տոկոսով։ Հունիսին այս ցուցանիշը կազմել էր 4.1 տոկոս։ 

Զբոսաշրջիկի ծախսերի մյուս կարևոր բաղադրիչներից՝ սննդամթերքի և ոչ ալկոհոլային խմիչքների գները հուլիսին նախորդ տարվա նույն ամսվա համեմատ աճել են 7.4 տոկոսով։ Միևնույն ժամանակ, նվազել են տրանսպորտի գները 1.2 տոկոսով, իսկ հանգստի և մշակույթի ոլորտում գների աճը կազմել է ընդամենը 0.1 տոկոս:

Այսպիսով՝ զբոսաշրջիկի համար Հայաստանում հանգստանալու ամբողջ արժեքը մեկ ցուցանիշով գնահատելը ճիշտ չէ․ որոշ ծախսեր թանկացել են, որոշների դեպքում էական փոփոխություն չի արձանագրվել։ Միևնույն ժամանակ, կացության և սննդի գների աճը զբոսաշրջիկի ծախսերի վրա ազդող հիմնական գործոններից է։ 

Հյուրանոցային շուկայի երկարաժամկետ պատկերը ևս հետաքրքիր է։ Հյուրանոցային ոլորտի ուսումնասիրություններով զբաղվող ամերիկյան HVS խորհրդատվական ընկերության՝ Հայաստանի վերաբերյալ 2026 թվականի ուսումնասիրության համաձայն՝ 2019-2025 թվականներին Հայաստանում հյուրանոցների միջին օրական գինը դոլարային արտահայտությամբ աճել է մոտ 25 տոկոսով։ Ուսումնասիրության համաձայն՝ այս աճի մի մասը պայմանավորված է նաև դրամի արժևորմամբ դոլարի նկատմամբ, ուստի տեղական արժույթով աճն ավելի համեստ է եղել։ 

Հյուրանոցների պահանջարկի աճը նույնպես նկատելի է։ Ուսումնասիրության տվյալներով՝ 2025 թվականին Հայաստանում հյուրանոցների միջին զբաղվածությունը կազմել է մոտ 68 տոկոս։ Դա շուրջ 10 տոկոսային կետով ավելի բարձր է, քան նախահամավարակային մակարդակը։ Ուսումնասիրության համաձայն՝ 2026 թվականի սկզբին զբոսաշրջային պահանջարկի աճը շարունակվել է։ 

Զբոսաշրջիկների թվի աճն արտահայտվում է նաև նրանց Հայաստանում անցկացրած ժամանակի մեջ։ 2026 թվականի հունվար-հունիսին Հայաստան այցելած զբոսաշրջիկներն ընդհանուր առմամբ մեր երկրում անցկացրել են ավելի քան 31.3 մլն գիշերակաց։ 

Այսպիսով, 2026 թվականի առաջին կեսին Հայաստանը ավելի շատ զբոսաշրջիկ է ընդունել, միաժամանակ որոշ կարևոր ծառայությունների գներն աճել են։ Հյուրանոցների և ռեստորանների ծառայությունները մեկ տարվա ընթացքում թանկացել են 4.9 տոկոսով, իսկ սննդամթերքի և ոչ ալկոհոլային խմիչքների գները՝ 7.4 տոկոսով։

Տրանսպորտի, ինչպես նաև հանգստի և մշակույթի ոլորտներում գների փոփոխությունն ավելի փոքր է եղել։ Այս տվյալները, սակայն, նաև հարց են առաջացնում․ եթե Հայաստանում զբոսաշրջիկների համար հիմնական ծառայությունների գները շարունակեն աճել, արդյո՞ք դա երկարաժամկետ հեռանկարում չի ազդի երկրի զբոսաշրջային մրցունակության վրա։

Առայժմ նման ազդեցության մասին խոսելը վաղ է․ 2026 թվականի առաջին կեսին զբոսաշրջային հոսքը, հակառակը, աճել է 14.8 տոկոսով։ Սակայն գների հետագա փոփոխությունը կարևոր գործոն կարող է դառնալ Հայաստանի՝ որպես զբոսաշրջային ուղղության գրավչության համար։ 

Արմեն Խեչումյան