Թուրքիայի ԱԳՆ խոսնակ Օնջու Քեչելիի խոսքով՝ Անկարան և Երևանը մայիսի կեսերին ավարտել են երկրների միջև ուղիղ առևտրի մեկնարկի նախապատրաստական աշխատանքները։

Հիշեցնենք, որ ավելի վաղ Հայաստանի վարչապետ Նիկոլ Փաշինյանը հայտարարել էր, որ Թուրքիան կսկսի իր ապրանքների մատակարարումը Հայաստան՝ առանց երրորդ երկրների միջոցով դրանք վերաձևակերպելու անհրաժեշտության։

Լրատվամիջոցի աղբյուրը նշել է, որ ներկա փուլում սահմանի բացման ամսաթիվը որոշված չէ, իսկ գործընթացի դինամիկան կախված կլինի երկկողմ երկխոսության զարգացումից։

Միևնույն ժամանակ, Անկարայում ակնկալում են կառուցողական բանակցությունների շարունակություն, որոնք, ինչպես սպասվում է, կնպաստեն Հարավային Կովկասում կայունության ամրապնդմանն ու բարիդրացիական հարաբերությունների զարգացմանը։

Հայաստանի և Թուրքիայի միջև դիվանագիտական հարաբերություններ չկան, իսկ սահմանը փակ է մնում 1993 թվականից։ Երկու երկրների հատուկ ներկայացուցիչների միջև բանակցությունները շարունակվում են 2022 թվականից, սակայն նախկինում ձեռք բերված պայմանավորվածությունները դեռևս կյանքի չեն կոչվել։