«Արսենալի» հարձակվողը գիշերային զվարճանքի է մասնակցել «Նոթինգհեմի» դեմ խաղից առաջ (Տեսանյութ)

Լոնդոնի «Արսենալի» նիգերիացի հարձակվող Ալեքս Իվոբին հայտնվել է սկանդալային իրավիճակում, գրում է The Sun-ը:

Համացանցում հայտնվել է տեսանյութ, որում 21-ամյա ֆուտբոլիստը «Նոթինգհեմ Ֆորեստի» դեմ Անգլիայի գավաթի խաղարկության 1/32 եզրափակիչի խաղից առաջ մասնակցում է երեկույթի: Մինչեւ գիշերվա ժամը 3:30-ը շարունակված երեկույթի ժամանակ եղել նաեւ թմրանյութեր ու ալկոհոլ, սակայն Իվոբին չի օգտագործել դրանք:

Հիշեցնենք, որ «Նոթինգհեմ Ֆորեստի» դեմ հունվարի 7-ին կայացած խաղում Ալեքս Իվոբին մեկնարկային կազմում հանդես էր եկել առանց փոխարինման, իսկ «Արսենալը» պարտվել էր 2:4 հաշվով եւ լքել պայքարը:

«Արսենալն» Արսեն Վենգերի գլխավորությամբ առաջին անգամ է Անգլիայի Գավաթից դուրս մնում երրորդ շրջանից: Ֆրանսիացի մասնագետը 1996-ից է գլխավորում լոնդոնյան ակումբը: