Թիվ 1 զենքը թուրքի ձեռքը դնում ենք մենք մեր անտարբերությամբ, 15 հոգու կյանք ուղղակի մատաղե՞լ ու սա պետք է մարսվի՞. Եփրեմ Մարգարյան (տեսանյութ)

Զինվորականները հեքիաթային ու աբսուրդի ժանրից են որակում 15 զինվորի կյանք խլած՝ վաշտի կացարանում բռնկված հրդեհի պատճառների մասին պետական մակարդակով շրջանառության մեջ դրված վարկածը։

«Աբսուրդի ժանրից է, ո՞նց կարող է 18 տարեկան երիտասարդը, որն անցել է պատերազմի միջով, չկարողանա հրդեհից դուրս գալ»,- նշել է մահապարտ ազատամարտիկ, արցախյան երեք պատերազմների մասնակից Եփրեմ Մարգարյանը։

Ինչ վերաբերում է այն փաստին, որ կացարանի պատուհանները եղել են զմռսված՝ ճաղավանդակներով՝ ազատամարտիկն արձագանքել է.«Լավ, ճաղավանդակներ են եղել, ցելոֆանով պատված, դրսում գտնվողներից մեկի համար դժվա՞ր էր պատռել ցելոֆաններից մեկն ու բղավել հրդեհ է, իսկ դուք գիտեք զինվորների զգոնությունը, նրա ենթագիտակցության մեջ արդեն նստվածք է տվել ձայնից անմիջապես արթնանալը»։

Ըստ նրա՝ զինվորները կարող էին ներքնակները գցել իրենց վրա ու դուրս գալ, ճիշտ է, այրվածքներով, բայց դուրս կգային։ Ավելին նա առաջարկել է կացարանում լցնել 10 լիտր բենզին ու հրդեհել՝ իրեն տալով մեկ ներքնակ, եւ ինքը բոլորի ներկայությամբ դուրս կգա այդ կացարանից։

«Ինչո՞վ են մտածում վերեւներում նստածները, սա ո՞ր մի զինվորականի, ո՞ր մի գեներալի խղճին է նորից մնալու ու սա պետք է մարսվի՞, մի քանի օր սգան ու նորից հանարդտվեն, անցնի գնա՞»,- հայտարարել է Ե. Մարգարյանը՝ կոչ անելով դատախազությանն ու ԱԱԾ-ին պարզել բոլոր հանգամանքները։

Նա անընդունելի է համարել հանրության շրջանում առկա այս անտարբերությունը՝ նշելով, որ պատերազմն անխուսափելի է, իսկ թուրքի ձեռքը թիվ 1 զենքը մենք են դնում մեր անտարբերությամբ։

Մանրամասները՝ տեսանյութում։