Փհենյանի միջուկային հավակնություններն ու սադրանքները «լուրջ սպառնալիք» են․ Հրվ․ Կորեայի նախագահ

Հյուսիսային Կորեայի հրթիռային փորձարկումների աճը, միջուկային հավակնությունների աճը եւ այլ սադրիչ գործողությունները «լուրջ սպառնալիք» են, որոնք կարող են հանգեցնել վտանգավոր սխալ հաշվարկի եւ ավելի լայն կոնֆլիկտ առաջացնել: Այս մասին AP-ին տված հարցազրույցում ասել է Հարավային Կորեայի նախագահ Յուն Սուկ Յոլը։

«Պատմության մեջ բազմիցս եղել են դեպքեր, թե ինչպես են սխալ հաշվարկները հանգեցրել լուրջ պատերազմների»,-նշել է նա՝ հավելելով, որ Հյուսիսի միջուկային զինանոցն ուղղակի սպառնալիք է ներկայացնում ԱՄՆ-ի մայրցամաքային հատվածի, ինչպես նաեւ Հարավային Կորեայի եւ հարեւան Ճապոնիայի համար:

Նրա խոսքով՝ Հյուսիսային Կորեայի անօրինական սադրանքները կարող են հանգեցնել միայն անվտանգության ոլորտում արձագանքման ներուժի ուժեղացմանը եւ Հարավային Կորեայի, ԱՄՆ-ի եւ Ճապոնիայի միջեւ անվտանգության ոլորտում համագործակցության հետագա ամրապնդմանը:

Խոսելով ԱՄՆ-ի հետ համատեղ պլանավորման քննարկումների մասին՝ նա նշել է, որ առաջարկվող ծրագրերը ներառում են «կաբինետային վարժանքներ, համակարգչային մոդելավորում եւ վարժանքներ միջուկային զենքի մատակարարման միջոցներով»։

«Ընթանում է այսպես կոչված համատեղ պլանավորման եւ կատարման քննարկում, եւ ես կարծում եմ, որ Հարավային Կորեայի եւ ԱՄՆ-ի համար ճիշտ է համագործակցել, քանի որ մենք երկուսս էլ միջուկային սպառնալիքի ենք ենթարկվում Հյուսիսային Կորեայի կողմից»,-նշել է Հարավային Կորեայի նախագահը ՝ չհրապարակելով մանրամասները:

Ավելի վաղ պաշտպանության նախարար Լի Չոն Սուպը հայտարարել է, որ հարավկորեացի եւ ամերիկացի զինվորականները ծրագրում են հաջորդ ամիս հրամանատարաշտաբային զորավարժություններ անցկացնել։