Համաշխարհային բանկն Ուկրաինային հատկացրել է լրացուցիչ 500 մլն դոլար

Համաշխարհային բանկը երկուշաբթի տեղեկացրել էր Ուկրաինային լրացուցիչ 500 մլն դոլար հատկացնելու մասին, որպեսզի օգնի երկրին բավարարելու անհետաձգելի ծախսերը, որոնք առաջ են եկել Ռուսաստանի ներխուժման եւ շարունակվող պատերազմի պատճառով, հաղորդել է «Голос Америки»-ն։

Վերակառուցման եւ զարգացման միջազգային բանկի, որը Համաշխարհային բանկի գլխավոր վարկային ստորաբաժանումն է, ֆինանսավորումն ապահովվել է Մեծ Բրիտանիայի 500 մլն դոլար գումարի չափով վարկային երաշխիքներով, որոնց մասին հայտարարվել էր սեպտեմբերի 30-ին, նշվել է կազմակերպության հաղորդագրությունում։

Վարկը հատկացվել է Ուկրաինայի վերականգնմանը նվիրված համաժողովի նախօրեին, որը տեղի է ունենալու երեքշաբթի Բեռլինում, եւ որի ընթացքում ազգային առաջնորդները, զարգացման գծով փորձագետները եւ ընկերությունների ղեկավարները քննարկելու են, թե ինչպես վերականգնեն Ուկրաինան պատերազմի ավարտից հետո։

«Ռուսաստանի ներխուժումը շարունակում է հանգեցնել ուկրաինական ենթակառուցվածքի զանգվածային ավերածությունների, ներառյալ ջրամատակարարումը, կոյուղին եւ էլեկտրական ցանցերը, այն դեպքում, երբ մոտենում է ձմեռը, ինչն ավելի վտանգավոր է դարձնում ուկրաինացի ժողովրդի գոյությունը»,- ասել է Համաշխարհային բանկի նախագահ Դեւիդ Մալփասը։

«Այսօր հատկացված ֆինանսավորման նոր ռաունդը կօգտագործվի հիմնական պետական ծառայություններին աջակցելու համար։ Մենք մտադիր ենք սատարել ուկրաինացի ժողովրդին, քանի որ նա բախվել է այս աննախադեպ ճգնաժամին»,- նշվել է հայտարարությունում։

Համաշխարհային բանկն ընդհանուր առմամբ 13 մլրդ դոլար է հատկացրել Ուկրաինային, որոնցից 11,4 մլրդ-ն լրիվ իրացվել է։