Սաուդյան Արաբիան նավթը որպես զենք չի օգտագործում, ինչպես պնդում են ամերիկացիները․ Աբդել ալ-Ջուբեյր
Սաուդյան Արաբիան նավթը որպես զենք չի օգտագործում, ինչպես պնդում են ամերիկացիները։ Այս մասին CNN-ին տված հարցազրույցում ասել է Սաուդյան Արաբիայի արտգործնախարար Աբդել ալ-Ջուբեյրը՝ հերքելով այն, որ նավթի արդյունահանումը կրճատելու ՕՊԵԿ+-ի որոշումը քաղաքական դրդապատճառ ուներ։
«Մենք փորձում ենք համոզվել, որ գների անկայուն տատանումներ չունենք»,-ասել է նա։
Ալ-Ջուբեյրը հերքել է, որ նավթի արդյունահանումը կրճատելու ՕՊԵԿ+-ի որոշումը քաղաքական դրդապատճառ ուներ։ Նրա խոսքով՝ կրճատումը կատարվել է նավթի գների մեծ տատանումներից խուսափելու համար, որոնք կարող են ազդել ամբողջ աշխարհում սպառողների վրա։
«Սաուդյան Արաբիան Ռուսաստանի կողքին չէ»,-ասել է նա։ «Սաուդյան Արաբիան նավթի շուկաների կայունությունն ապահովելու ջանքերի կողքին է։ Սաուդյան Արաբիան նավթը չի քաղաքականացնում։ Մենք նավթը որպես զենք չենք օգտագործում»,-հավելել է նախարարը։