Փոխգնդապետ Վերանյանի պաշտոնի բարձրացումը մեր երեխեքի գլխաքանակով եղավ. զոհվածների հարազատները արդարություն են պահանջում

Արցախի Քաշաթաղի շրջանի Իշխանաձորի խաչմերուկում 18 զինծառայողի զոհվելու գործով դատական նիստը մեկ տարուց ավելի է, ինչ դատարանում է։ Զոհված զինծառայողների ծնողները NEWS.am-ի հետ զրույցում հույս հայտնեցին, որ իրենց որդիների մահվան մեղավորները կպատժվեն, բայց նաեւ մտահոգված են, որ Քրեական օրենսգրքի փոխվելուց հետո հնարավոր է, որ գործով ամբաստանյալ Անդրանիկ Վերանյանին մեղսագրվող արարքը մեղմացվի։

«Դժգոհ ենք պետությունից, որովհետեւ Քրեական օրենսգրքի փոփոխության հետեւանքով կան հոդվածների կետեր, որոնք հանցագործություն չեն համարվում, կան, որ օրենքի հետադարձ ուժ են ունենում։ Այդ հիմքերով էլ շատ դատական պրոցեսներ կարճվում են։ Մենք մտահոգություն ունենք, որ կարող է Վերանյան մարդասպանն արդարացվել։ Նա սպանել է փաստացի 18 երեխաների»,- նշեց զոհված զինծառայող Արտաշես Խալաթյանի հայրը՝ Հակոբ Խալաթյանը։

Ըստ զոհվածի ծնողի՝ դատական նիստերը ձգձվում են երբեմն արհեստածին հիմքերով. «Գործով վկա, 44-օրյա պատերազմի ժամանակ եղել է կորպուսի հրամանատարի տեղակալ Արտակ Մախսուդյանը նույնիսկ չի բարեհաճում դատարան ներկայանալ։ Այս ամենն իր ձեռքի տակով է անցել, նույնիսկ ճանապարհն ինքն է ցույց տվել եւ հետ է դարձել, այսպես ասած՝ փախել է։ Ակնկալում ենք արդար դատ, եթե հանկարծ դատական նիստին որոշվի մեղադրանքը հանել կամ Վերանյանին արդարացնելու որոշում կայացվի, մենք դիմելու ենք մինչեւ Եվրոպական դատարան։ Ունենք կենդանի 3 վկա, դատարանում շատերը փաստել են այդ մասին»։

Զոհված զինծառայողի ծնող Ալմաստ Հարությունյանն ասաց, որ իրենք պայքարելու են, որ իրենց որդիների մահվան մեջ մեղավորները պատժվեն. «Չենք հասկանում, թե ով է այս գործի հետեւում կանգնած, որ այս մարդու պաշտոնն են բարձրացնում, աշխատանքի են թողնում։ Վերջը այս երկրում արդարություն պետք է լինի՞։ Մենք արդարություն ենք ուզում, որ մեղավորները պատժվեն»։

Նա պատմեց՝ գործով վկաներ կան, որոնք հրաժարվում են վկայություն տալ. «Վախենում են, մարդիկ են ուղարկում տները, վախեցնում են, կաշառում են։ Կոնկրետ իմ տուն մարդ են ուղարկել, ասում են՝ այսպես մի արա, այնպես մի արա։ Ես ասել եմ՝ ես չեմ վաճառվում, հետո սկսեցին վախեցնելը՝ դու մի որդի էլ ունես, ինչ գիտես՝ հետո ինչ կգա ձեր գլխին։ Ես գիտեմ, որ իմ երեխուն հետ չեմ բերի, բայց պետք է մինչեւ վերջ գնանք, որ մեր երկրում գոնե մեկը պատժվի»։

Զոհված զինծառայող Արթուր Խաչատրյանի մայրը՝ Աննա Իվանյանը, պնդեց, որ իրենց տղաներին գիտակցաբար են ուղարկել մահվան. «Նրանք պետք է թվաքանակ ցույց տային այն բանի համար, որ ասեին՝ անխուսափելի էր այս պատերազմը, բայց մեր երեխաների գլխաքանակո՞վ։ Եթե իրենց հրաման էր տրված հողերը հանձնելու, թող տային, բայց մեր երեխաների կյանքի գնո՞վ։ Նա պաշտոնի բարձրացումը մեր երեխեքի գլխաքանակով ստացավ։ Դուրս է գալիս, որ նա չպատժվեց»։

Հիշեցնենք, որ ըստ մեղադրանքի, Վերանյանը 2020-ի հոկտեմբերի 9-ին ստացել է հրաման` զորամասի անձնակազմը Հորադիսի շրջանից տեղափոխել Տիլ գյուղ: Իշխանաձորում լսել են ԱԹՍ-ի ձայն, բայց փոխգնդապետը հրամայել է նստել ավտոմեքենան եւ շարունակել ճանապարհը: 5 րոպե անց ԱԹՍ-ն հարվածել է Ուրալին: Զոհվել է 18 զինծառայող, մեկը ստացել է մարմնական վնասվածքներ: Զինծառայողները մինչեւ պատերազմի սկսելը ծառայում էին Մեղրիի ու Ագարակի զորամասերում։ Պատերազմի սկսելուն պես տղաներին Արցախ են տարել։ Զինծառայողներից մեկի հայրն իմանալով, որ որդուն տեղափոխում են Արցախ, իր ավտոմեքենայով մեկնել է որդու մոտ։ Հայրն ականատես է եղել, թե ինչպես են որդին ու ծառայակիցները զոհվում։

Ի սկզբանե դատական նիստը պետք է տեղի ունենար Սյունիքի մարզի ընդհանուր իրավասության դատարանում, սակայն տուժողների իրավահաջորդներն դատարանին միջնորդել էին նիստերն անցկացնել Երեւանում, քանի որ դժվար է ամեն դատական նիստին ներկա լինելու համար հասնել Սյունիք:

Նշենք, որ Անդրանիկ Վերանյանը 2 ամսով կալանավորված է եղել, պահվել է «Վարդաշեն» քրեակատարողականում, այնուհետեւ նրա խափանման միջոցը փոփոխվել է եւ ստորագրությունը որպես խափանման միջոց ընտրվել։