Ինդոնեզիան մոտ 30 տոկոսով բարձրացրել է սուբսիդավորված վառելիքի գները
Ինդոնեզիան շաբաթ օրը մոտ 30 տոկոսով բարձրացրել է սուբսիդավորված վառելիքի գինը, հայտնել են բարձրաստիճան պաշտոնյաները, քանի որ կառավարությունը փորձում է զսպել սուբսիդիաների մեծացումը՝ չնայած զանգվածային բողոքի վտանգին, հաղորդում է Reuters-ը:
Շաբաթ օրը՝ տեղական ժամանակով ժամը 14:30-ից, հայտարարությունից հետո մեկ ժամվա ընթացքում սուբսիդավորված բենզինի գինը 7650-ից բարձրացվեց մինչեւ 10.000 ռուփի (67 ԱՄՆ ցենտ) լիտրի դիմաց, իսկ սուբսիդավորված դիզելային վառելիքի գինը 5150 ռուփիից բարձրացավ մինչեւ 6.800 ռուփի լիտրի դիմաց, հայտնել է էներգետիկայի նախարար Արիֆին Թասրիֆը։
«Իրականում ես ցանկանում էի վառելիքի ներքին գները մատչելի պահել՝ սուբսիդիաների տրամադրման հաշվին, սակայն սուբսիդավորման բյուջեն եռապատկվել է եւ կշարունակի աճել,- մամուլի ասուլիսին ասել է Ինդոնեզիայի նախագահ Ջոկո Վիդոդոն:- Կառավարությունը դժվարին իրավիճակում պետք է որոշում կայացնի։ Դա վերջին ելքն է իշխանության համար»։
Հարավարեւելյան Ասիայի խոշորագույն տնտեսությունն արդեն ավելացրել է իր էներգետիկ սուբսիդիաները 2022 թ. համար մինչեւ 502 տրիլիոն ռուփի (34 միլիարդ դոլար), ինչը երեք անգամ գերազանցում է սկզբնական բյուջեն: Ֆինանսների նախարար Շրի Մուլյանի Ինդրավատիի խոսքով, չնայած վառելիքի գների աճին, ավելի շատ գումար կպահանջվի, իսկ գումարը կախված կլինի նավթի համաշխարհային գներից: Նրա գնահատմամբ՝ էներգիայի ընդհանուր սուբսիդիաներն այս տարի գների աճից հետո կկազմեն 591 տրիլիոն եւ 649 տրիլիոն ռուփի միջակայքում՝ պայմանով, որ նավթի միջին գինը մինչեւ 2022-ի վերջը կմնա 85-100 դոլարի մակարդակում բարելի դիմաց։
Մինչ թանկացումներն էներգիայի սուբսիդավորման բյուջեն 698 տրիլիոն ռուփի էր կազմում։