Մնացական Մարտիրոսյանը ընտրեց խուսափելու մեթոդը. ես այստեղ դատարան չեմ տեսնում. Աղվան Հովսեփյանի պաշտպան

Ինքնաբացարկի միջնորդությունը հաստատ չի ընդունվելու դատավոր Մնացական Մարտիրոսյանի կողմից, որովհետեւ ինքը խնդիր ունի այս գործը քննելու, Աղվան Հովսեփյանին երկարաժամկետ կալանքի տակ պահելու եւ կայացնի պատվիրված դատական ակտը։ Այս մասին այսօր՝ օգոստոսի 4-ին, դատական նիստից հետո լրագրողների հետ զրույցում ասաց Աղվան Հովսեփյանի պաշտպան Երեմ Սարգսյանը։

Նշենք, որ Հովսեփյանի պաշտպանները միջնորդել էին հրատապ դատական նիստ հրավիրելու մասին։ Այսօրվա նիստին պաշտպանները դատավոր Մնացական Մարտիրոսյանին ինքնաբացարկ հայտնելու միջնորդություն էին ներկայացրել։

«Այս պրիմիտիվ հանգամանքը, որ ինքը խափանման միջոցի հարցը չի քննարկում, առանց քննության է թողնում ու ասում է՝ նոր հանգամանք չկա։ Այստեղ այնքան պարզ տրամաբանական հարց է, որը ինքը չի հասկանում, այսինքն՝ հասկանում է, բայց չի անում։ Ասում ենք՝ անձն ունի ծանր հիվանդություն, ավելի ծանր ընթացք է ստացել եւ այլ հիվանդություններ ունի։ Այս հանգամանքը յուրաքանչյուր դատավորի պարտավորեցնում է՝ անհապաղ քննարկել, տեսնել՝ այդ հիվանդությունների պայմաններում արդյոք անձին պետք է ազատ արձակի, թե՝ ոչ։ Մնացական Մարտիրոսյանը ընտրեց խուսափելու մեթոդը, իբր թե նոր հանգամանք չենք ասել։ Այս աբսուրդների մակարդակը, որ պարոն Մարտիրոսյանը անում է եւ փորձում է փաթաթել հասարակության վզին, իրավաբանական մեթոդներ է կարդում, ուզում է տպավորություն թողնել, թե իբր օրինական որոշում կայացրեց»,-նշեց նա։

Երեմ Սարգսյանը շեշտեց, որ Աղվան Հովսեփյանի առողջական վիճակը ծանր է, եւ անհասկանալի է, թե ինչին է սպասում դատավոր Մարտիրոսյանը. «Ասում է՝ սա բժշկի կարծիք է, բա ո՞ւմ կարծիքն եք ուզում, որ քեզ վերեւից զանգեն, ասեն՝ ընգեր, այլեւս մեր կարծիքը փոխվեց, բժիշկի կարեւոր չի, ո՞վ է քեզ համար այդ հեղինակավոր կարծիքը. այս փաստաթուղթ տանենք, իրեն ներկայացնենք։ Ես այստեղ դատարան չեմ տեսնում»։

Նշենք, որ Աղվան Հովսեփյանի արյան մեջ գլյուկոզայի մակարդակը բարձրացել էր մինչեւ 31.6 մմոլ/լ-ի, ինչը կարող է նաեւ կրկնվել։ Բժիշկները մասնագիտական կարծիք են ներկայացրել առ այն, որ Աղվան Հովսեփյանի մոտ առկա են դիաբետի դեկոմպենսացիայի հետեւանքով առաջացած քրոնիկական բազմաթիվ բարդություններ, մեծ է հավանականությունը արյան մեջ գլյուկոզայի մակարդակի բարձրացման՝ ընդհուպ մինչեւ 31 եւ ավել մմոլ/լ, որը կարող է հանգեցնել կոմայի, ինչը ծանր վտանգ է համարվում մարդու առողջության եւ կյանքի համար։ Այս հանգամանքով պայմանավորված՝ պաշտպանը միջնորդություն է ներկայացրել դատարան՝ Աղվան Հովսեփյանի առողջական վիճակով պայմանավորված Հովսեփյանի նկատմամբ ընտրված խափանման միջոց կալանավորման փոփոխման հարցը քննարկման առարկա դարձնելու համար։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը մինչ այդ շուրջ 1.5 տարի քննություն էր իրականացրել՝ առանց Հովսեփյանին հարցաքննության հրավիրելու։ Նրան միանգամից մեղադրանք են առաջադրել եւ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) եւ 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը:

Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին: