Գյումրեցին վաղուց արդեն ՀՀԿ-ի խոստումներին չի հավատում. փորձ ունի

Հայաստանում Ազգային ժողովի ընտրություններ են: Գործելու է ընտրական նոր օրենսգիրք: Նոր օրենսգրքի համաձայն՝ լինելու է համամասնական կարգով ընտրություն: Սա թերեւս միակ փոփոխությունն է: Նույնն է մնացել թեժ ընտրապայքարը, ընտրակեղծարարության միջոցները, անձինք, ընտրակաշառք բաժանելը եւ զուր խոստումներ տալը:

2017 թվականի խորհրդարանական ընտրություններին հաղթելու տրամադրվածությամբ մասնակցում է հանրապետական կուսակցությունը՝ Սերժ Սարգսյանի գլխավորությամբ:

Սերժ Սարգսյան քաղաքական գործիչը տարբեր ընտրությունների ժամանակ շատ խոստումներ է տվել, սակայն միայն տվել է, բայց չի իրականացրել:

Բավական է հիշել 2007-2012 թվականներին ՀՀԿ-ի տվածխոստումները: Գյումրեցին, իհարկե, հիշում է այս խոստումները եւ այլեւս որեւէ նոր խոստման չի հավատում. փորձ ունի:

2007 թվականի մայիսի 5. ՀՀ Ազգային ժողովի ընտրություններ: ՀՀԿ-ն առաջադրել եւ սատարում է մի քանի թեկնածուների, իսկ այդ տարիներին ՀՀ վարչապետ Սերժ Սարգսյանը գյումրեցիներին գիշեր ու ցերեկ աշխատելու խոստումներ է տալիս. «Ես եկել եմ, որ խոստանամ՝աշխատելու եմ գիշեր ու ցերեկ, ծառայելու եմ ազնիվ: Եթե ձեզ պետք է գործ, ապա ընտրեք գործի մարդուն»,- «Քեզ համար Հայաստան, քեզ համար Գյումրի» կարգախոսով հայտարարում է Սերժ Սարգսյանը:

2007 թվականին Սերժ Սարգսյանը Գյումրու թատերական հրապարակից հայտարարում է, որ իր վարչապետ լինելու տարիներին կենսաթոշակները, նպաստները եւ ուսուցիչների աշխատավարձը բարձրացել են երեք անգամ: Սերժ Սարգսյանը այսօր մոռանում է, որ նույն թոշակները եւ նպաստները, աշխատավարձերի հետ միասին, արդեն չեն բարձրանում երեք տարի: Վերջին անգամ բարձրացում եղել է 2014-ի ավարտին՝ 1000-ական դրամով:

2007-ին չկատարված խոստումներին ավելանում են 2008-ի նախագահական ընտրությունների խոստումները: Խոստանում են Գյումրին դարձնել նախանձելի քաղաք: Խոստուներին զուգահեռ՝ գյումրեցին տարիների ընթացքում դրական փոփոխություն չի նկատում:

Գիշեր ու ցերեկ աշխատող նախագահի ղեկավարման առաջին տարիներից՝ 2008-ին Գյումրու մշտական բնակիչների թիվը, ըստ Ազգային վիճակագրական ծառայության պաշտոնական տվյալների, եղել է 146 հազար մարդ: Ներկայում, նույն գերատեսչության տվյալներով, այն կազմում է 118 հազար, 2008-ից 2015 թվականներին այս քաղաքը լքել է 28 հազար մարդ:

Սերժ Սարգսյանի առաջին անգամ նախագահ ընտրվելու տարում՝ 2008-ին, Գյումրիում աղքատությունը եղել է 27,6 տոկոս: ԱՎԾ-ի պաշտոնական տվյալների համաձայն՝ Սարգսյանի կառավարումից չորս տարի անց՝ 2011-ին աղքատությունը կազմում է 35 տոկոս, իսկ Շիրակի մարզում աղքատ է բնակչության 47.7 տոկոսը: Ներկայում միայն Գյումրու աղքատությունն է 45 տոկոս, բայց դա էլ պաշտոնական տվյալների համաձայն: Որոշ ուսումնասիրողներ աղքատության մակարդակը հասցնում են մինչեւ 75 տոկոսի:
2009 թվականին, կրկին Սերժ Սարգսյանի խոստումներին զուգահեռ, գրանցվում է 14.1 տոկոս տնտեսական անկում: ԱՎԾ-ի այս տվյալները համեմատելով մյուս տարիների հետ պարզ է դառնում, որ այս ցուցանիշը գերազանցում է 1998 թվականին տեղի ունեցած տնտեսակական անկման ամենացածր ցուցանիշին:

2007-ին եւ 2008-ին չիրականացված խոստումներին ավելանում են նորերը:

2012 թվական. նախագահի հերթական ընտրություն: Սերժ Սարգսյանը եւ հանրապետական կուսակցությունը գյումրեցի ընտրողին ներկայանում են «Հավատանք, որ փոխենք» կարգախոսով:

«Ես խոստացել էի, որ Գյումրիի համար շատ բան եմ անելու, որ Գյումրին վերջ ի վերջո դառնալու է Հայաստանի հյուսիսային մայրաքաղաքը»,- կրկին իրեն ձայն տալու խնդրանքով՝ Սերժ Սարգսյանը կեղծ խոստումներ է տալիս:

2012-ի նախընտրական քարոզարշավի շրջանակներում՝ գյումրեցուն աշխատատեղ են խոստանում, բայց այսօր Գյումրիում գործազուրկ է բնակչության կեսից ավելին:

Սա Սերժ Սարգսյանի խոստումների եւ Գյումրու ներկա վիճակի միայն մի մասն է:

Բարեկեցության փոխարեն այսօր ունենք արտագաղթ, աղքատություն, գործազրկություն, անօթեւանություն, եւ Սերժ Սարգսյանը կրկին նախընտրական գործընթացներում է:

Շարունակելի
Դավիթ Գասպարյան

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)