Տարոն Ոսկանյանը եւ Կամո Հովհաննիսյանն ամեն ինչ արեցին, որ Ռումինիան հաղթի

Ոմանք կարծում են, որ եթե ֆուտբոլիստները գնդակին հարվածում են հիմնականում ոտքով, ապա ֆուտբոլը մտքի, խելքի խաղ չէ: Իրականում ֆուտբոլում հաղթում են նրանք, ովքեր այս խաղին վերաբերվում են որպես մտքի խաղի: Ցավոք, ֆուտբոլիստներ կան, որոնք այդպես էլ չեն հասկանում այս պարզ ճշմարտությունը:

Ֆուտբոլի աշխարհի առաջնության ընտրական փուլի ութերորդ տուրում E խմբում ընդգրկված Հայաստանի հավաքականը Բուխարեստում մրցեց Ռումինիայի հավաքականի հետ: մեծ հաշվով երկու հավաքականներն էլ գործնականում կորցրել էին երկրորդ տեղի համար պայքարելու հնարավորությունը եւ պետք է ազատված լինեին ավելորդ կաշկանդվածությունից:

Առաջին խաղակեսը Հայաստանի հավաքականը ոչնչով չզիջեց ռումիններին: Ավելին, Հայաստանի հավաքականն ուներ գոլ խփելու երկու, իսկ ռումինները մեկ հնարավորություն:

Պատկերը փոխվեց երկրորդ խաղակեսում: Նախ արդեն դեղին քարտ ունեցող Տարոն Ոսկանյանը մրցակցի հարվածի ճանապարհը փակեց ձեռքով, ստացավ երկրորդ դեղինը, հեռացվեց դաշտից, մրցակցին նվիրեց 11 մետրոնոց հարված:

Բարեբախտաբար դարպասապահ Գրիգոր մելիքսեթյանը ետ մղեց հարվածը: Անկեղծ լինենք, ռումինները շատ վատ տպավորություն թողեցին ամբողջ խաղում եւ եթե չլիներ այս կարմիր քարտը եւ Մխիթարյանն էլ անակնկալ չպասիվանար, ապա մեր հավաքականը կարող էր եւ հաղթել:

Ռումինիայի հավաքականը չէր էլ հաղթի, եթե խաղավերջում խաղի տեմպը չգցեր Կամո Հովհաննիսյանը, որը որոշեց ծանր վնասվածք ձեւացնել: Խաղը մի պահ ընդհատվեց: Նա ռումիններին շունչ քաշելու, իսկ մեր ֆուտբոլիստներին զգոնությունը կորցնելու հնարավորություն տվեց: Ավելին, մրցավարին թույլ տվեց ավելացնել հինգ րոպե: Հենց այդ ավելացված րոպեին էլ ռումինները գրավեցին Մելիքսեթյանի դարպասը՝ ջուրը գցելով նրա ամբողջ չարչարանքը:

Այս պատմությունն այն մասին էր, որ եթե ֆուտբոլ չես խաղում խելքով, ապա անպայման պարտվում ես: ցավոք Տարոն Ոսկանյանը եւ Կամո Հովհաննիսյանը ֆուտբոլին այդպես էլ լուրջ չվերաբերվեցին, բայց նրանց համառորեն հրավիրում են հավաքական: Օզբիլիսի նման տաղանդավոր ֆուտբոլիստը նստած մնաց պահեստայինների նստարանին, իսկ Կամո Հովհաննիսյանը խաղավերջում շանս պարգեւեց ռումիններին:

Մեր խմբում կայացավ եւս երկու խաղ: Դանիան 4:0 հաշվով հաղթեց Լեհաստանին, իսկ Չեռնոգորիան 3:0 հաշվով՝ Ղազախստանին:

Անդրադառնանք Հ1-ի մեկնաբաններին: Այնպիսի տպավորություն էր, կարծես նրանք ոչ թե հայ, այլ առնվազն մոլդովայից լինեին: Նրանք անհամբեր սպասում էին, թե Անդոնեն երբ է գոլ խփելու կամ Մելիքսեթյանը երբ է սխալվելու: Սա էլ մի առանձին տխուր պատմություն է:

Սամվել Պետրոսյան

Top-News.am