Դպրոցներ փակող երկիրը

Երբ երկրում, պետությունում ուսումնական օջախները ոչ թե բացվում են, այլ փակվում, ապա դա վկայում է խորը եւ սուր բարոյահոգեբանական եւ սոցիալ-տնտեսական ճգնաժամի մասին:

Եթե սոցիալ-տնտեսական վիճակը ծանր լիներ, բայց բարոյահոգեբանական մթնոլորտը լիներ պատշաճ մակարդակի վրա, ապա դպրոցներ չէին փակվի: Հիմա դպրոցներ են փակվում, այն էլ բավական մեծ արագությամբ: Ամենավատն այն է, որ հասարակությունն այս ամենի նկատմամբ անտարբեր է: Ամռան ընթացքում փակվել է 36 դպրոց: Հավանաբար հատուկ են ընտրել մաշտոցյան այբուբենի տառերի թվով:

Ոմանք կհարցնեն, իսկ եթե պետությունը փող չունի, աշակերտների թիվը նվազում է, ապա ինչո՞ւ չփակել: Իսկ երբ նման հարց է հնչում, դա եւս մեկ անգամ եւս վկայում է բարոյալքման մասին: Եթե նույնիսկ դպրոցում մեկ աշակերտ մնա, ապա դպրոցը չպետք է փակվի: Եթե դպրոցը փակվում է, դա նշանակում է փակվում է հույսը, որ վաղն ավելի լավ է լինելու, եւ որ մեր երկիրն ավելի մեծ թվով բնակչություն է ունենալու:

Դպրոց չի կարելի փակել: Դպրոց փակելը հանցագործություն է: Առավել եւս հանցագործություն է, որ միավորումներն ընթանում են տարօրինակ ձեւով: Այսպես, իրականում փակվում է Ավետիք Իսահակյանի անվան թիվ 16 դպրոցը, բայց փաստաթղթերով փակվում է Գրիգոր Զոհրապի անվան թիվ 43 դպրոցը: Թիվ 16 դպրոցի հսկա շենքի ճակատագիրը մնում է անհայտ, իսկ թիվ 43 դպրոցում արդեն սովորելու են 16 եւ 43 ավագ դպրոցների աշակերտները:

Եւ ամենակարեւորը՝ անհայտ է մնում, թե ինչ ճակատագրերի են արժանանալու փակված դպրոցների շենքերը:

Սարսափելի է, երբ անկախությունից հետո 26-րդ տարում փակվում են դպրոցներ: Սարսափելի է, որ հասարակությունն անտարբեր է:

Top-News.am 

Այս թեմայով Սեւանի քաղաքապետն ու Գեղարքունիքի մարզպետը կտտանքների են ենթարկում աշակերտներին եւ ուսուցիչներին