Սիմոն Մարտիրոսյանը՝ Ունիվերսիադայի չեմպիոն

Ռիո 2016-ի արծաթե մեդալակիր, Եվրոպայի 2017 թ. չեմպիոն ՀՀ ծանրամարտի հավաքականի անդամ Սիմոն Մարտիրոսյանը դարձել է 2017 թ. համաշխարհային ուսանողական խաղերի չեմպիոն: Այսօր՝ օգոստոսի 24-ին, Թայփեյում ընթացող խաղերում նա ոսկե մեդալ նվաճեց երկամարտի 401 կգ արդյունքով: Պոկում վարժությունը նա ավարտեց 180, իսկ հրումը՝ 221 կգ-ով:

Այս քաշային կարգում 2-րդ տեղը զբաղեցրեց ռուս Ռադիոն Բաչկովը՝ երկամարտի 390 կգ արդյունքով: Բրոնզե մեդալակիր դարձավ իրանցի Քիա Ղադամին:

Սա 2017 թ. Ունիվերսիադայում Հայաստանի ծանրամարտի հավաքականի 2-րդ մեդալն էր: Երեկ արծաթե մեդալակիր էր դարձել Եվրոպայի 2016 թ. չեմպիոն 85 կգ քաշային Անդրանիկ Կարապետյանը (364 կգ):

Սիմոն Մարտիրոսյանի ոսկին 2-րդն է Ունիվերսիադային մասնակցող հայ մարզիկների համար: Ավելի վաղ չեմպիոն էր դարձել մարմնամարզիկ Արթուր Թովմասյանը (օղակներ): Թաեքվոնդոիստ Սերգեյ Վարդազարյանն էլ բրոնզե մեդալակիր է դարձել: