Իսկ մի օր գոնե խոսելո՞ւ ենք հայկական ակումբային ֆուտբոլի խայտառակության մասին

Ադրբեջանի չեմպիոն, «Ղարաբաղ» անվամբ ֆուտբոլային թիմը հայտնվեց Չեմպիոնների լիգայի խմբային մրցաշարում: 

Հարավային Կովկասի երկրներից առաջինն Ադրբեջանին հաջողվեց նման հաջողության հասնել: Իսկ գոնե հիմա մենք համարձակություն կունենա՞նք անդրադառնալ հայկական ակումբային ֆուտբոլին, թե՞ ոչ:

Գոնե հիմա կփորձե՞նք հասկանալ, թե ինչու Հայաստանի չեմպիոնը մի կերպ կարողացավ հաղթահարել փլեյ օֆֆի նախնական փուլը, դժվարությամբ հաղթելով Անդորրայի չեմպիոնին:

Հիսունհինգ երկրների թվում Հայաստանի ակումբային ֆուտբոլի վարկանիշն ընդամենը 4,875 է եւ զբաղեցնում են 46-րդ տեղը: Վրաստանը 5,0 վարկանիշով 45-րդն է, իսկ ահա Ադրբեջանը 22-րդ տեղում է, իսկ վարկանիշը 17,625 է:

Հիմա շատերը կշտապեն ասել, թե Ադրբեջանը նավթ ունի, իսկ մենք չունենք: Իհարկե, Ադրբեջանը նավթ ունի, իսկ ի՞նչ ունեն Մոլդովան, Ալբանիան, Մակեդոնիան, Կիպրոսը եւ վերջապես Բելառուսը:

Եթե մենք երջանիկ ենք մեր ակումբային ֆուտբոլի խայտառակ վիճակով, ապա քննարկում պետք չէ: Այսպես, ուրեմն, լավ է: Իսկ եթե բավարարված չենք, ապա վերջապես պետք է լուրջ քննարկում սկսել, թե ինչու է ակումբային ֆուտբոլը նման թշվառ վիճակում, որ հազիվ վեց թիմ է մնացել առաջնությանը, իսկ նրանցից շատերի ֆինանսական վիճակը, մեղմ ասած, ծանր է:

Ադրբեջանի առաջնությանը մասնակցում է ութ թիմ, բայց ունեն նաեւ լիարժեք առաջին խումբ, ոչ թե Հայաստանի նման ձեւական: 

Խնդիրները շատ են՝ սկսած մանկապատանեկան ֆուտբոլից, եւ մի օր այս մասին պետք է շատ լուրջ քննարկում սկսել:

Սլավա Բաղդասարյան

Top-News.am