ՀՀԿ-ի նկատմամբ գյումրեցին անտարբեր է

Գյումրիում նախընտարական կրքերը գնալով թեժանում են: Ապրիլին կայանալիք համապետական ընտրություններին ընդառաջ՝ իշխանական կողմի §դաբրո¦ ստացած թեկնածուները ջանք ու եռանդ չեն խնայում ընտրազանգվածի աչքին եւս մեկ անգամ լրացուցիչ ներկայանալու համար:

Կենտրոնական ընտրական հանձնաժողովում, պատգամավորների թեկնածուների գրանցման մեկնարկին զուգահեռ, հավանական թեկնածուների մոտ շարունակում են հարցերի անորոշ պատասխաններ մնալ:

Բանն այն է, որ հանրապետական կուսակցությունը, մասնավորապես Գյումրիում որոշ թեկնածուների ռեյտինգային ցուցակով առաջադրվելու հետ կապված, չի տվել իր վերջնական համաձայնությունը: Սրանով պայմանավորված՝ այն թեկնածուները, ովքեր դեռ հստակ չգիտեն իրենց անելիքները, սկսել են ժողովրդին եւս անորոշության մեջ գցել:
Նրանց ամենօրյա զուր եւ փոփոխվող խոստումները, վախվորած գործողությունները, գյումրեցի ընտրողին օրեցօր ավելի է հուսալքում: Թեկնածուների չկողմնորոշվածությանը եւ քաղաքական ճամբարների անընդհատ փոփոխությանը գյումրեցին սկսել է անտարբեր վերաբերվել:

Աղքատ քաղաքի բնակիչներին այլեւս չի հետաքրքրում, թե որ թեկնածուն ինչ քաղաքական ուժով է ընտրություններին ներկայանալու. «Ով էլ ընտրվի իր համար է միայն լավ լինելու: Մեր մասին մտածող չկա: Ես սովետական երկրում ապրած մարդ եմ՝ լավ եմ ապրել, կյանք եմ տեսել: Հիմա, որ սրանք խոստումներ են տալիս կամ այս կուսակցությւոնից դուրս են գալիս ու մտնում՝ մյուսը, ինձ էլ չի հետաքրքրում: Շատ բան եմ լսել, բայց 30 տարի է դոմիկի մեջ եմ ապրում»,- մեզ հետ զրույցում ասաց գյումրեցի տարեց Ստելա Խաչատրյանը:

Գյումրիում այլեւս չեն զարմանում, որ ընդդիմադիրը կարող է մեկ օրվա ընթացքում դառնալ իշխանական կամ հակառակը: Գյումրեցիները սա համարում են §անձնական շահով¦ պայմանավորված քաղաքականություն: Իրենց ասածը հիմանավորում են ՀՅԴ-ի իշխանամետ դառնալը՝ սահմանադրական հանրաքվեի նախաշեմին, միաժամանակ հիշելով իշխանության հասցեին հնչեցրած բացասական կարծիքները:

Քիչ, թե շատ՝ գյումրեցիները փոփոխության հույսեր կապում են ընդդիմադիր ուժերի եւ դաշինքների հետ:

Դավիթ Կարապետյան