ԱՄՆ-Աշխարհ պատանեկան հավաքականների մրցախաղի առաջին քայլը կատարել է Գարի Կասպարովը

Սենթ Լուիսում մեկնարկել է «ԱՄՆ-Աշխարհ» պատանեկան հավաքականների մրցախաղը, որն անցկացվում է 2 տարիքային խմբերով՝ մինչև 17 և մինչև 14 տարեկաններ:

Այս մասին հայտնում է Հայաստանի շախմատային ֆեդերացիայի պաշտոնական կայքը:

Աշխարհի հավաքականի անդամներին ընտրել է ՖԻԴԵ-ի մարզչական հանձնաժողովը, իսկ վերջնական կազմը հաստատվել է ՖԻԴԵ-ի նախագահության նիստում:

Մինչև 17 տարեկանների աշխարհի հավաքականում է ընդգրկվել աշխարհի մինչև 16 տարեկանների չեմպիոն, միջազգային վարպետ Հայկ Մարտիրոսյանը:

Երեկ կայացել են մրցաշարի մեկնարկային տուրերը, իսկ մրցախաղի առաջին քայլը Հայկ Մարտիրոսյան-Ջեֆֆրի Սյուն պարտիայում կատարել է աշխարհի 13-րդ չեմպիոն Գարրի Կասպարովը:

Հայկ Մարտիրոսյան-Ջեֆֆրի Սյուն պարտիան արդյունքում ավարտվել է ոչ-ոքի հաշվով, իսկ առաջին մրցախաղն ավարտվել է 2-2 հաշվով:

2-րդ տուրում Հայկ Մարտիրոսյանը պարտություն է կրել ԱՄՆ-ը ներկայացնող մեր հայրենակից Սամուել Սևյանից:

2-րդ մրցախաղը նույնպես ավարտվել է 2-2 հաշվով:

Մինչև 14 տարեկանների պայքարի առաջին մրցախաղում աշխարհի հավաքականը 2.5-1.5 հաշվով առավելության է հասավ ԱՄՆ-ի նկատմամբ:

Մինչև 17 տարեկանների մրցախաղում անցկացվելու է 8 տուր, իսկ մինչև 14 տարեկանների պայքարում՝ 4: