Անհրաժեշտ է նախագահների հնարավոր հանդիպմանն ապահովել ԼՂ կարգավորման վերաբերյալ կոնկրետ ծրագրի քննարկում. Մամեդյարով

Անհրաժեշտ է Հայաստանի և Ադրբեջանի հնարավոր նախագահների հանիդպմանն ապահովել Լեռնային Ղարաբաղի հակամարտության կարգավորման ուղղությամբ կոնկրետ ծրագրի և դրա իրականացման վերաբերյալ քննարկում: Այդ մասին «ՌԻԱ Նովոստի» գործակալությանը հայտարարել է Ադրբեջանի արտգործնախարար Էլմար Մամեդյարովը:

Հուլիսի 11-ին Բրյուսելում ԵԱՀԿ Մինսկի խմբի համանախագահների նախաձեռնությամբ կայացել է Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպումը: ԵԱՀԿ ՄԽ համանախագահները հանդիպման արդյունքներով հայտարարությունում խնդրել են Հայաստանի և Ադրբեջանի նախագահներին փոխանցել 2017 թվականին երկու պետությունների նախագահների հանդիպման անցկացման մասին առաջարկը:

«Հանդիպմանբ առաջարկվել է հանդիպում անցկացնել պետությունների նախագահների մակարդակով: Արտգործնախարարները բնականաբար պետք է այդ առաջարկը համաձայնեցնեն պետությունների ղեկավարների հետ: Հանդիպումները կարևոր բաղադրիչ են հակամարտության կարգավորման գործընթացում»,- հայտարարել է Մամեդյարովը:

Սակայն, ինչպես նշել է ադրբեջանցի նախարարը, «այդ հանդիպումները չպետք է անցկացվեն հանդիպումների համար»:

«Եթե կազմակերպվում է հանդիպում նախագահների մակարդակով, կարծում եմ, անհրաժեշտ է ապահովել համանախագահների կողմից առաջարկվող հակամարտության կարգավորման ծրագրի և դրա իրագործման քննարկում»,- հավելել է նա:

tert.am