Եթե Թուրքիան պայմաններ առաջադրի Գերմանիային Կոնիայի ՆԱՏՕ-ի ռազմաբազա այցելելու համար՝ միանշանակ կմերժվի. Մերկել

Գերմանիայի կանցլեր Անգելա Մերկելը հայտարարել է, որ Գերմանիան չի պատրաստվում քննարկել Թուրքիայի հետ թուրքական Կոնիա քաղաքում գտնվող ՆԱՏՕ-ի ռազմական ավիաբազայում իրենց ծառայությունն անցկացնող գերմանացի զինվորականներին այցելելու հարցը, այս մասին հայտնում է գերմանական Deutsche Welle հեռուստառադիոընկերության թուրքալեզու ծառայությունը:

Մերկելն ընդգծել է, որ նրանց այս իրավունքն ու պահանջը չի կարող օգտագործվել Թուրքիայի հետ այլ թեմաների շուրջ քաղաքական քննարկումների մեջ և եթե Թուրքիան փորձի պայմաններ առաջադրել՝ միանշանակ կմերժվի:

Ավելի վաղ Թուրքիայի փոխվարչապետ և կառավարության խոսնակ Նուման Քուրթուլմուշը, խոսելով Կոնիայի ռազմաբազա գերմանացի պատգամավորների այցելության մասին, նշել էր, որ նրանց այցը ժամանակավորապես հետաձգվել է երկու երկրների միջև առկա լարված հարաբերությունների պատճառով:

Քուրթուլմուշը նաև հավելել էր, որ Կոնիայի ռազմաբազան պատկանում է ՆԱՏՕ-ին՝ ի տարբերություն Ադանայում գտնվող «Ինջիրլիք» ռազմաբազայի, որը թուրքական է. այդ իսկ պատճառով նրանք չեն կարող առարկել գերմանացի պատգամավորների այցին:

Հիշեցնենք, որ ամիսներ առաջ Թուրքիան պնդել էր, որ գերմանացի պատգամավորներին կարգելվի մուտք գործել «Ինջիրլիք» ռազմաբազա, քանի դեռ Բեռլինը չի փոխել իր բացասական վերաբերմունքն Անկարայի հանդեպ: Դրանից հետո Գերմանիայի խորհրդարանը որոշում է ընդունել դուրս բերել իրենց զինվորականներին «Ինջիրլիք»-ից:

tert.am