Այո, աշունը լինելու է թեժ, ինչպես թեժ էր գարունը, ամառը. Աշոտյան

Նիկոլ Փաշինյանի իշխանության գալուց հետո Հայսատանում ամեն ամիս եւ տարվա ամեն եղանակ է թեժ. Այս պարագայում քաղաքական կլիշեները չեն աշխատում, որովհետեւ 2018-ի մայիսից սկսած տարբեր պատճառներով այս կառավարությունն առիթ է ստեղծել, որ ցանկացած ամիս թեժ անցնի Հայաստանում: Այս մասին, այսօր՝ սեպտեմբերի 22-ին, լրագրողների հետ հանդիպման ժամանակ նշեց ՀՀԿ փոխնախագահ Արմեն Աշոտյանը:

Նրա խոսքով, այս ամենի հիմքում դրված է Նիկոլ Փաշինյանի եւ իր կառավարության կիսագրագետ, դեմագոգիկ, անպատասխանատու կեցվածք. «Այս կառավարությունը կարծես կոմիքսների հերոսների կառավարություն լինի: Ցավոք դրա գինը վճարում է ժողովուրդն ու պետությունը: Այո, աշունը լինելու է թեժ, ինչպես թեժ էր գարունը, ամառը, եւ ինչպես ձմեռն է թեժ լինելու: Այսօր ունենք աճող դժգոհություն, խորացող տնտեսական ճգնաժամ»,-ասաց Աշոտյանը:

Նա նաեւ անդրադարձավ ընդդիմադիր դաշտին՝ նշելով, որ այնտեղ կան տարբեր շերտեր, տարբեր խաղացողներ եւ այնտեղ բուռն գործընթացներ են. «Իշխանությունը պարբերաբար փորձում է սեպ խրել կամ նոր բաժանարար գծեր քաշել ընդդիմության ներսում, դա արվում է ՀՀԿ-Ռոբերտ Քոչարյան, Սերժ Սարգսյան-Ռոբերտ Քոչարյան գծով, նաեւ փորձել են անել ՀՀԿ-ԲՀԿ ճամբարով: Դա շատ տեսանելի է, բայց ի պատիվ մեզ, մենք այս պահի դրությամբ ի վիճակի ենք եղել եւ կլինենք անցյալում թողնել տարաձայնությունների նստվածքը»,-ասաց ՀՀԿ փոխնախագահը: