Հազարավոր ուղտեր Քաթարի դեմ կիրառվող պատժամիջոցների զոհ են դարձել

Քաթարի բնակիչներին պատկանող հազարավոր ուղտեր սատկել են ծարավից, երբ Սաուդյան Արաբիայի իշխանությունները պահանջել են վերացնել կենդանիների նախիրներն իրենց տարածքից:

Ինչպես փոխանցում է Lenta.ru-ն, Սաուդյան Արաբիայից վերադարձած ուղտապահներից մեկի խոսքով` հարյուրավոր սատկած կենդանիներ են փռված ճանապարհին, ինչպես նաև հարյուրավոր սատկած ոչխարներ: Տարբեր գնահատումներով վերջին օրերին Քաթար վերադառնալու ճանապարհին 12-25 000 ուղտ է սատկել:

Քաթարի իշխանությունները որոշել են օգնել գյուղատնտեսներին և սահմանի մոտ հատուկ ճամբար են ստեղծել, որտեղ շուրջ 8000 «անապատի նավ» են տեղավորել: Այնտեղ ուղտերին ջուր և ուտելիք են տրամադրում, իսկ անասնաբույժները հետևում են կենդանիների առողջությանը:

Նախքան Քաթարի նկատմամբ պատժամիջոցների սահմանումը, քաթարցի ագարակատերերը հնարավորություն ունեին իրենց կենդանիներին տեղակայել հարևան թագավորության տարածքում:

Քաթարի մեկուսացումն սկսվեց հունիսի 5-ին, երբ Սաուդյան Արաբիան, Բահրեյնը, Եգիպտոսը և Արաբական Միացյալ Էմիրությունները խզեցին հարաբերությունները Դոհայի հետ` վերջինիս մեղադրելով արաբական երկրների տարածաշրջանում ներքին քաղաքական իրավիճակն ապակայունացնելու և ահաբեկչության ֆինանսավորման համար: Ավելի ուշ նրանց միացան ևս 6 պարսիցծոցյան երկիր:

tert.am