Բակո Սահակյանը՝ նախագահի թեկնածու

Լեռնային Ղարաբաղում իշխող կոալիցիայի մաս կազմող «Արցախի ժողովրդավարական կուսակցությունը» այսօր ԼՂ նախագահի պաշտոնում առաջադրեց գործող նախագահ Բակո Սահակյանի թեկնածությունը: Մոտ երեք շաբաթից ԼՂ խորհրդարանն ընտրելու է անցումային շրջանի նախագահին: Սահակյանն առայժմ նախագահի միակ թեկնածուն է։

«Ազատության» հետ զրույցում ԱԺԿ խորհրդարանական խմբակցության ղեկավար Վարդգես Բաղրյանն ասաց․ «Այսօր տեղի է ունեցել ԱԺԿ 5-րդ համագումարը, որի ընթացքում կայացվել է որոշում՝ առաջիկա նախագահական ընտրություններում առաջադրել գործող նախագահ Բակո Սահակյանի թեկնածությունը»:

Բաղրյանը նշեց, որ առաջիկա օրերին տեղի կունենան կոալիցիոն գործընկեր «Ազատ Հայրենիք» կուսակցության և ՀՅԴ խմբակցության քննարկումները, որոնց արդյունքում հստակություն կմտնի նաև քաղաքական այդ ուժերի կողմից առաջադրվելիք թեկնածուների հարցում։

Այս տարի փետրվարի 20-ին անցկացված սահմանադրական փոփոխությունների հանրաքվեի արդյունքում ԼՂ-ում հաստատվեց կառավարման լիրարժեք նախագահական համակարգ: Նոր Սահմանադրությամբ՝ առաջիկա երեք տարիներին՝ մինչև 2020 թվականը, Ղարաբաղը կկառավարվի անցումային փուլի ռեժիմով: Այդ փուլում կպաշտոնավարի խորհրդարանի կողմից ընտրված նախագահը:

Գործող նախագահ Բակո Սահակյանը նախկին Սահմանադրությամբ նախատեսված երկու ժամկետով արդեն պաշտոնավարել է: Չնայած այդ հանգամանքին, ԼՂ նախագահի աշխատակազմի ղեկավարի տեղակալ Դավիթ Բաբայանը պնդում է, որ օրենքը Սահակյանին չի արգելում նորից առաջադրվել․ «Սա անցումային շրջան է, հնարավոր է նաև այդպիսի զարգացում, օրենքի տեսանկյունից չի արգելվում»: Հարցին՝ արդյո՞ք Սահակյանը ցանկանում է կրկին նախագահ դառնալ, Բաբայանը պատասխանեց՝ դեռ առաջարկ չեն ստացել, ստանալու դեպքում այն կքննարկվի։

3 տարի տևող անցումային փուլի ընթացքում Ղարաբաղում կառավարման համակարգ է փոխվելու, կարգավորվելու է նոր իրավական դաշտը։ Դրանից հետո՝ արդեն 2020 թվականին, Ղարաբաղում նախագահական և խորհրդարանական ընտրություններ կանցկացվեն։

Ղարաբաղի խորհրդարանի ընդդիմադիր «Վերածնունդ» խմբակցության ղեկավար Հայկ Խանումյանի պնդմամբ, կատարված սահմանադրական փոփոխություններն ի սկզբանե Բակո Սահակյանի ղեկավարման ժամկետը երկարաձգելու նպատակ ունեին: «2016 թվականին իմ հստակ և ուղիղ հարցին՝ արդյոք դուք ցանկանու՞մ եք 2017-20 թվականներին մնալ անցումային շրջանի նախագահ, ինքը [Բակո Սահակյանը] դրական պատասխան է տվել: Այս ամբողջն իր ցանկության արդյունքն է»,- «Ազատությանն» ասաց Խանումյանը: Նա կարծում է, որ Բակո Սահակյանն, ի վերջո, կընտրվի, քանի որ «այս խորհրդարանը դեմ չի քվեարկի նրա թեկնածությանը»։

Ղարաբաղի նախագահի աշխատակազմի ղեկավար Դավիթ Բաբայանը, մինչդեռ, ընդդիմախոսներին հիշեցնում է՝ սահմանադրական փոփոխությունների հանրաքվեն ազատ է եղել, ԼՂ բնակիչներն են ընտրել կառավարման այս ձևը: Իսկ թե ով կընտրվի նախագահ, այդ մասին խոսելը դեռ վաղ է: «Եղել է բաց, թափանցիկ գործընթաց, և դրա արդյունքում ունենք այն, ինչ ունենք»,- հավելեց Բաբայանը:

Լեռնային ղարաբաղի խորհրդարանը հուլիսի 19-ից 29-ը ընկած ժամանակահատվածում նիստ կգումարի և անցումային նախագահ կընտրի։ Նոր Սահմանադրությամբ վարչապետի պաշտոն նախատեսված չէ՝ կառավարությունը կձևավորվի և կղեկավարվի նախագահի կողմից: Արդեն այս տարվա սեպտեմբերին գործող վարչապետ Արայիկ Հարությունյանը վայր կդնի լիազորությունները, իսկ ԼՂ Ազգային ժողովի ներկայիս նախագահ Աշոտ Ղուլյանն իր պաշտոնը կպահպանի մինչև 2020 թվականի ընտրությունները։