Ադրբեջանին հունից հանել է «Նեզավիսիմայա գազետա»-ն

Ադրբեջանը շարունակում է պնդել, որ ռուսաստանյան լրատվամիջոցները շարունակում են աջակցել Լեռնային Ղարաբաղի իշխանություններին, որոնց ադրբեջանական լրատվամիջոցներն անվանում են անջատողականների վարչակազմ:

Ադրբեջանական մամուլը հիշում է, որ մեկ տարի առաջ ռուսաստանյան լրատվամիջոցներն իրենց լրագրողներին ուղարկել էին Արցախ եւ նրանք ապրիլյան պատերազմի մասին գրում էին բացառապես հայկական կողմի տեսակետները ներկայացնելով:

Հիմա էլ Ադրբեջանին դժգոհություն է պատճառել մի քանի օր առաջ ռազմաճակատի գծում տեղի ունեցածի վերաբերյալ ռուսաստանյան լրատվամիջոցների արձագանքը: 

Առավել մեծ զայրույթ ադրբեջանցիներին պատճառել է «Նեզավիսիմայա գազետա»-ն, որը համարձակվել է ոչ միայն հայկական կողմի տեսակետները ներկայացնել, այլ Լեռնային Ղարաբաղի փոխարեն օգտագործել է Արցախ անվանումը:

Ադրբեջանական լրատվամիջոցներն իրենց ընթերցողներին հիշեցնում են, որ վերջերս տեղի ունեցած հանրաքվեի ժամանակ ԼՂՀ-ն վերանվանվել է Արցախի Հանրապետություն: Ադրբեջանական լրատվամիջոցները դժգոհում են, որ ռուսաստանյան լրատվամիջոցներն օգտագործում են, իրենց բնորոշմամբ՝ առասպելական Արցախ անվանումը:

Բաքվի լրատվամիջոցները երկրի ղեկավարությանն առաջարկում են բողոք հայտնել ռուսաստանյան կողմին: «Եթե Մոսկվան սուր է արձագանքում ադրբեջանական լրատվամիջոցների հրապարակումները Ռուսաստանի մասին, ապա պարտավոր է հարգել Ադրբեջանի ինքիշխանությունը»,- գրել է ադրբեջանցի հոդվածագիրներից մեկը:

Top-News.am