Սպիտակ տունը դիմել է Գերագույն դատարանին՝ ներգաղթն արգելող հրամանագրի գործողությունը վերականգնելու խնդրանքով

Սպիտակ տունն ԱՄՆ գերագույն դատարան դիմում է ուղարկել՝ խնդրելով վերականգնել մեծ մասամբ մահմեդական բնակչությամբ վեց երկրից ներգաղթը ժամանակավորապես արգելող հրամանագրի գործողությունը: Այդ մասին հայտնում է Reuters գործակալությունը:

«Մենք խնդրել ենք Գերագույն դատարանին վերանայել այդ կարևոր գործը, և վստահ ենք, որ նախագահ Թրամփի հրամանագրերը մտնում են պետության անվտանգության ապահովմանը և ահաբեկչությունից մեր հասարակությունը պաշտպանելուն վերաբերող իր օրինական լիազորությունների մեջ»,- ասված է ԱՄՆ արդարադատության նախարարության պաշտոնական ներկայացուցիչ Սառա Ֆլորեսի հայտարարությունում:

Ինչպես նշվում է՝ գործը դիտարկելու է ինը դատավոր: Որպեսզի նախկինում արգելափակված հրամանագիրն անհապաղ ուժի մեջ մտնի, հարկավոր է նրանցից հինգի հավանությունը:

Արդեն երկու անգամ դաշնային դատավորները կանգնեցրել են նախագահի հրամանագիրը, որով սահմանափակվում էր ԱՄՆ մուտքը մի շարք երկրների քաղաքացիների համար: Կառավարությունը բողոքարկել է այդ որոշումը:

Թրամփը մարտի 6-ին ստորագրել է նոր հրամանագիր, որն ԱՄՆ մուտքի ժամանակավոր արգելք է սահմանում հիմնականում մահմեդական բնակչությամբ Մերձավոր Արևելքի և Հյուսիսային Աֆրիկայի վեց երկրի՝ Իրանի, Սուդանի, Սոմալիի, Սիրիայի, Եմենի, Լիբիայի քաղաքացիների համար:

Առաջին նմանատիպ հրամանագիրը Թրամփը ստորագրել էր հունվարի 27-ին, այսինքն՝ երդմնակալությունից մեկ շաբաթ անց: Այդ հրամանագրում «սև ցուցակում» ներառվել էր 7 պետություն՝ այդ թվում Իրաքը, որը երկրորդ տարբերակում հանվել է ցուցակից:

tert.am