Օբաման` Թրամփի որոշման մասին. «ԱՄՆ–ն մերժում է ապագան»

ԱՄՆ նախկին նախագահ Բարակ Օբաման հայտարարել է, որ Կլիմայի մասին փարիզյան համաձայնագրից դուրս գալով՝ երկիրը մերժում է ապագան,– հաղորդում է «Բլումբերգ» գործակալությունը։

Հինգշաբթի օրը Թրամփը հայտարարել է, որ ԱՄՆ–ն դուրս է գալիս «Կլիմայի մասին փարիզյան համաձայնագրից»։ Իր ելույթում նա նշել է, որ երկիրը նոր բանակցություններ կսկսի այս ոլորտում նոր համաձայնագրի ուղղությամբ։

«Նույնիսկ եթե Թրամփի վարչակազմը միացել է սակավ պետություններին, ովքեր մերժում են ապագան, ես համոզված եմ, որ մեր պետությունները, քաղաքներն ու ձեռնարկությունները կակտիվանան, եւ նույնիսկ ավելին կանեն, որպեսզի առաջատար դեր խաղան եւ նպաստեն մեր միակ մոլորակի պահպանմանը, որը մենք ունենք ապագա սերունդների համար»,– ասել է Օբաման։

Օբաման նաեւ նշել է, որ Փարիզյան համաձայնագիրը «նոր հնարավորություններ է ստեղծել բացահայտելու ձեռնարկությունների, գիտնականների, ճարտարագետների բարձրտեխնոլոգիական եւ ցածրածխածնային ներդրումների եւ նորարարությունների աննախադեպ ծավալներով ներդրման ներուժը»։

Կլիմայի մասին փարիզյան համաձայնագիրը առաջին գլոբալ կլիմայական համաձայնագիրն է, որ ստորագրվել է 194 երկրների կողմից, 2015 թվականին։ Կլիմայի փոփոխության վերաբերյալ Փարիզյան համաձայնագիրը միավորում է գրեթե ամբողջ աշխարհի երկրները, բացառությամբ Սիրիայի եւ Նիկարագուայի: Համաձայնագրին միացած երկրները պարտավորվել են կրճատել արտանետումները, որոնք բացասական ազդեցություն ունեն շրջակա միջավայրի վրա: Արտանետումների կրճատումը ենթադրում է նաեւ նոր ծախսեր արտադրողների համար:

Top-News.am