Օդերևութաբանները կրկին փոթորկի նախազգուշացում են հայտարարել Մոսկվայում

ՌԴ օդերևութաբանները նախազգուշացրել են Մոսկվայում օրվա ընթացքում սպասվող մինչև 15-20 մ/վրկ ուժգնությամբ քամու մասին, հայտնում է ТАСС-ը:

«Հունիսի 1-ից մինչև հունիսի 2-ի ժամը 11։00-ն Մոսկվայում և Մոսկվայի մարզում տեղ-տեղ սպասվում է կարճատև անձրև, քամու ուժգնացում մինչև 15-20 մ/վրկ»,- ասված է օդերևութաբանական ծառայության հաղորդագրությունում:

Չորեքշաբթի Մոսկվայում նույնպես նախազգուշացրել էին քամու ուժգնացման մասին:

Ավելի վաղ հաղորդվել է, որ մայիսի 29-ին Մոսկվայի մարզում տեղի ունեցած ուժգին փոթորկի հետևանքով զոհվել է 16 մարդ: Ռուսաստանի Քննչական կոմիտեի պաշտոնական ներկայացուցիչ Սվետլանա Պետրենկոն մանրամասնել էր, որ փոթորկի հետևանքով Մոսկվայում մահացել է 11 մարդ։ Ավելի ուշ Մոսկվայի մարզպետ Անդրեյ Վորոբյովը հայտնել էր, որ Մերձմոսկվայում մահացել է 5 հոգի: Քաղաքապետի մամուլի քարտուղարի փոխանցմամբ՝ տարերային աղետի հետևանքով տապալվել էր մոտ 3.500 ծառ: Բացի այդ, փոթորիկը վնասել էր ավտոմեքենաները, էլեկտրափոխանցման լարերն ու երկաթուղային ճանապարհները:

tert.am