Հունիսը շատ շոգ չի լինի, ամենաշոգ օրը կլինի հունիսի 1-ին. Գագիկ Սուրենյան

Հունիսին եւ օդի ջերմաստիճանը, եւ տեղումները նորմայի սահմանում կլինի: Այս մասին այսօր` մայիսի 30-ին, ՀՀ ԱԻՆ հիդրոմետծառայության օդերեւութաբանության կենտրոնի պետ Գագիկ Սուրենյանը: Նա նշեց, որ Արարատի, Արմավիրի մարզերի, Արագածոտնի եւ Կոտայքի եւ Վայոց ձորի նախալեռներում առանձին օրերին ցուրտ օդային հոսանքների ներխուժման պայմաններում գիշերային ժամերին չի բացառվում, որ ջերմաստիճանը իջնի +7-+12, իսկ արեւադարձային տաք օդային զանգվածների ներթափանցման դեպքում` ցերեկային ժամերին ջերմաստիճանը բարձրանա +33-36 աստիճան:

«Շիրակը, Կոտայքի լեռնային շրջանները, Գեղարքունիքը, Արագածոտնի եւ Վայոց ձորի լեռնային շրջաններում առանձին օրերին գիշերը ջերմաստիճանը կիջնի մինչեւ +3-+5,իսկ առանձին օրերին էլ, հատկապես ամսվա երկրորդ տասնօրյակում` +24-+28-ի: Լոռու մարզում նվազագույն ջերմաստիճանը ամսվա առաջին տասնօրյակում գիշերը կանխատեսվում է +3-+6, իսկ ամսվա երկրորդ կեսին` ցերեկը ջերմաստիճանը կհասնի մինչեւ +25-+30-ի»,-ասաց նա:

Գագիկ Սուրենյանը նշեց, որ Տավուշի մարզում նվազագույն ջերմաստիճանը ամսվա առաջին կեսին, գիշերը կիջնի մինչեւ +5-+8, իսկ առանձին դեպքերում` ցերեկային ժամերին ջերմաստիճանը կհասնի+28-+34 աստիճանի: Սյունիքի մարզում հովտային շրջաններում ջերմաստիճանը առանձին դեպքերում գիշերը կիջնի մինչեւ +10-15,իսկ արեւադարձային տաք օդային հոսնաքների ներթափանցման դեպքում ցերեկային ժամերին ջերմաստիճանը կհասնի +33-+37 աստիճանի:

Գագիկ Սուրենյանը նշեց, որ մայրաքաղաքում ամսվա առաջին տասնօրյակում գիշերային ժամերին ջերմաստիճանը կարող է նվազել +7-+10 աստիճանի, իսկ ամսվա երկրորդ տասնօրյակում` ջերմաստիճանը կհասնի +34-+36 աստիճանի:

Գագիկ Սուրենյանը նշեց, որ հունիսի ամենաշոգ օրը սպասվում է հունիսի 1-ին, օդի ջերմաստիճանը կհասնի մինչեւ 32 աստիճան, սակայն, վաղվանից օդի ջերմաստիճանը կնվազի: Նրա խոսքով, հունիսի 1-3-ը սեւծովյան ցիկլոնի ազդեցության ներքո կլինի: Օրվա առաջին կեսին կայուն արեւային եղանակ կլինի, երկրորդ կեսին` ամպրոպային ամպածություն կզարգանա: Արագածոտնի, Շիրակի մարզում մեծ է կարկտի հավանականությունը:

Գագիկ Սուրենյանը նշեց, որ հունիսին զգալիորեն ցերեկվա տեւողությունը կմեծանա` մայիսի նկատմամբ մոտ կես ժամով: Հունիսին անկանոն եղանակային պայմանները հիմնականում հանրապետության հյուսիսային շրջաններում են պահպանվում, օվա առաջին կեսին հիմնականում անձրեւ, ուժեղ քամի, կարկուտ է լինում: Մյուս շրջանները հունիսի երկրորդ տասնօրյակից հետո անցնում են կայուն եղանակային գոտու: Նրա խոսքով, հունիսի ամենաբարձր ջերմաստիճանը 1998թ. է գրանցվել, երբ օդի ջերմաստիճանը հասել է 39.4 աստիճանի:

 NEWS.am