Չեչնիայում միասեռականների հետապնդումն իրականացվել է իշխանությունների հրամանով

Human Rights Watch միջազգային իրավապաշտպան կազմակերպությունը զեկույց է հրապարակել Չեչնիայում միասեռականների ճնշումների և խոշտանգումների մասին:

Փաստաթղթում խոսվում է 2017 թվականի փետրվարի վերջից առնվազն մինչև ապրիլի սկիզբ միասեռականների հետապնդումների մասին: Կազմակերպության տվյալներով՝ դրանք իրականացվել են «Չեչնիայի պաշտոնատար անձանց հրամանով և ղեկավարությամբ», իսկ LGBT համայնքի հետապնդումներում առանցքային դեր է խաղացել, հնարավոր է, Չեչնիայի խորհրդարանի ղեկավար Մագոմեդ Դաուդովը:

HRW-ն խնդրել է Ռուսաստանի նախագահ Վլադիմիր Պուտինին և երկրի կառավարությանը դատապարտել միասեռականների հետապնդումները և իրականացնել բռնության մասին հաղորդումների մանրակրկիտ և անկողմնակալ հետաքննություն:

Զեկույցում նաև կոչ է արվում Եվրամիությանը, Կանադային, ԱՄՆ-ին և Ավստրալիային միջոցներ ձեռնարկել հետապնդումներից տուժածներին անվտանգ ապաստան տրամադրելու համար:

Ապրիլին «Новая газета»-ն նյութ է հրապարակել այն մասին, որ Չեչնիայում ձերբակալվել է միասեռականության համար կասկածվող մոտ 100 մարդ: Թերթի հաղորդմամբ՝ նրանք խոշտանգումների են ենթարկվել, սպանվել է առնվազն երեք մարդ:

tert.am