Խելահեղ վերջին տուր Գերմանիայում

Ֆուտբոլի Գերմանիայի առաջնության վերջին տուրից առաջ, ճիշտ է, արդեն պարզ էր, որ չեմպիոնը Բավարիան է, իսկ Լայպցիգը՝ երկրորդն է, բայց դեռ կային բազմաթիվ չլուծված հարցեր:

Այսպես, պետք է որոշվեր, թե ով է երրորդը՝ Դորտմունդի Բորուսիան, թե Հոֆենհայմը: Պարզ չէր, թե որ թիմերն են Գերմանիան ներկայացնելու Եվրոպայի լիգայում: Ավելին, պարզ չէր, թե ով է այն թիմը, որը պետք է անցումային խաղեր անցկացնի Երկրորդ բունդեսլիգայում երրորդ տեղը գրավածթիմի հետ:

Չափազանց լարված պայքարում անցավ Դորտմունդի Բորուսիայի եւ Բրեմենի Վերդերի հանդիպումը: Դորտմունդցիները պայքարում էին երրորդ տեղի համար, իսկ Վերդերը՝ Եվրոպայի լիգայում տեղ գրավելու համար: 68-րդ րոպեին հյուրերը հաղթում էին 3:2 հաշվով, բայց Մխիթարյանի նախկին թիմն ուժ գտավ եւ հաղթեց 4:3 հաշվով:

Քյոլնը վստահ հաղթանակ տարավ Մայնցի նկատմամբ 2:0 հաշվով եւ հանգրվանեց հինգերորդ տեղում:

Ամենալարված հանդիպումը կայացավ Համբուրգում: Դաշտի տերերն ընդունել էին Վոլֆսբուրգին: Ոչ-ոքիի եւ հյուրերի հաղթանակի դեպքում անցումային խաղեր պետք է անցկացներ Համբուրգը: 88-րդ րոպեին հաշիվը 1:1 էր, բայց դաշտի տերերը գերջանքեր գործադրեցին եւ հաղթեցին 2:1 հաշվով եւ պահպանեցին տեղը ուժեղագույնների խմբում, իսկ Վոլֆսբուրգը անցումային խաղեր կանցկացնի Բրաունշվայգի Այնտրախտի հետ:

Չնայած 2:6 հաշվով կրած պարտությանը Հերտան կխաղա Եվրոպայի լիգայում, քանի որ Ֆրայբուրգը 4:1 հաշվով պարտվեց չեմպիոն Բավարիայից:

Այսպիսով, ուժեղագույնների խմբում մյուս մրցաշրջանում Դարմշտադտին եւ Ինգոլշտադին կփոխարինեն Շտուտգարտն ու Հանովերը:

Լուսանկարում՝ պահ Համբուրգ-Վոլֆսբուրգ հանդիպումից

Top-News.am