Խելահեղ վերջաբան Անգլիայի առաջնությունում

Եվրոպական առաջատար ֆուտբոլային առաջնությունները մոտենում են ավարտին: Բոլոր հինգ առաջնություններում խելահեղ վերջաբան է ստացվել:

Բացառություն չի կազմում Անգլիայի առաջնությունը:

Ֆուտբոլի հայրենիքում առաջնության ավարտին մնացել է երեք տուր, բայց թիմերի զգալի մասը դեռ պետք է չորս խաղ անցկացնեն: Չեմպիոնի կոչումը վիճարկելու են Լոնդոնի երկու թիմեր «Չելսին» եւ «Տոտենհեմը»: Այս թիմերն անցկացրել են 34-ական հանդիպում եւ վաստակել համապատասխանաբար 81 եւ 77 միավոր:

Չեմպիոնների լիգայի մրցաշարին մասնակցելու իրավունք տվող 3-րդ եւ 4-րդ տեղերի համար լարված պայքար են մղում երեք թիմեր: «Լիվերպուլը», «Մանչեսթեր Սիթին» եւ Հենրիխ Մխիթարյանի «Մանչեսթեր Յունայթեդը» համապատասխանաբար ունեն 66, 66 եւ 65 միավոր: Նրանց պայքարին կարող է միջամտել նաեւ «Արսենալը», որն ունի 60 միավոր, սակայն մեկ խաղ պակաս է անցկացրել այս թիմերից:

Արդեն իսկ պարզ է, որ ուժեղագույնների խմբին հրաժեշտ կտա «Սանդերլենդը»: Պրեմիեր լիգայում տեղը պահպանելու տեսական հնարավորություններ է պահպանում «Միդլսբրոն»: Մինչեւ առաջնության վերջին րոպեն ուժեղների խմբում մնալու համար կատաղի պայքար են մղելու «Հալ սիթին» եւ «Սուոնսին»: Նրանց բաժանում է ընդամենը երկու միավոր:

Իսկ ովքեր են փոխարինելու անհաջողակներին: Չեմպիոնշիփի ավարտին մնացել է մեկ տուր: Պրեմիեր լիգայում խաղալու իրավունք են վաստակել 1901-ին հիմնադրված «Բրայթոն ընդ Հոուվ Ալբիոն» թիմը եւ «Նյուքասլը»: Մյուս ուղեգրի համար կպայքարեն «Ռեդինգը», «Շեֆիլդ Ուեդնեսդեյը», «Հադերսֆիլդ թաունը» եւ «Ֆուլհեմը»:

Top-News.am