Թուրք դեսպանը հուսով է, որ ռուս-թուրքական հարաբերություններ դեռ կզարգանան

Ռուսաստանի Դաշնությունում (ՌԴ) Թուրքիայի արտակարգ և լիազոր դեսպան Հուսեին Դիրիոզը հարցազրույց է տվել թուրքական «Anadolu» լրատվական գործակալությանը: Նա խոսել է ռուս-թուրքական հարաբերությունների հեռանկարների մասին:

Ըստ նրա՝ այժմ կա անհրաժեշտ քաղաքական կամք, որպեսզի բոլոր հարթակներում ռուս-թուրքական հարաբերությունները զարգանան:

Հիշեցնելով, որ 2016թ. Թուրքիայի և Ռուսաստանի նախագահները 3 անգամ հանդիպել են, նշել է. «Բացի դրանից մեր վարչապետերի և նախարարների միջև էլ բազմաթիվ հանդիպումներ և հեռախոսազրույցներ են տեղի ունենում:

Հենց դրա արդյունքում էլ առկա է այդ քաղաքական կամքը»: Վերջինս շեշտել է, որ քաղաքական կամքը պետք է ազդեցություն ունենա ոչ միայն երկկողմ տնտեսական հարաբերությունների, այլև մշակութային ու գիտական ոլորտների վրա:

Դեսպանը հաստատել է թուրքական և ռուսական մամուլում հայտնված այն տեղեկությունը, որ Թուրքիայի նախագահ Ռեջեփ Թայիփ Էրդողանը մարտին մեկնելու է Ռուսաստան, որպեսզի մասնակցի ռուս-թուրքական բարձրագույն մակարդակի համագործակցության ժողովին: Ավելի վաղ այդ տեղեկությունը հաստատել էր Վլադիմիր Պուտինի մամուլի քարտուղար Դմիտրի Պեսկովը:

Ermenihaber