Արցախի ԱԳ նախարարը շարունակում է հանդիպումները Ավստրալիայի խորհրդարանում

Ավստրալիայի խորհրդարանում շարունակվում են Արցախի Հանրապետության պատվիրակության քաղաքական հանդիպումները։

Ինչպես տեղեկացնում է ԱԳՆ մամուլի ծառայությունը, Արցախի Հանրապետության ԱԳՆ ղեկավար Մասիս Մայիլյանը հուլիսի 31-ին Ավստրալիայի Դաշնային խորհրդարանում հանդիպել է Տնտեսական հարցերի մշտական հանձնաժողովի նախագահ Թիմ Ուիլսոնի, ինչպես նաեւ խորհրդարանի Ներկայացուցիչների պալատի արտաքին հարաբերությունների եւ անվտանգության հարցերի հանձնաժողովի անդամ Ռեքս Փաթրիկի հետ։

Մասիս Մայիլյանը ներկայացրել է Արցախի Հանրապետության իշխանությունների գործունեությունն ինչպես արտաքին քաղաքականության, այնպես էլ անվտանգության ոլորտներում։ Այս համատեքստում նախարարն ընդգծել է, որ Արցախի միջազգային ճանաչումը կնպաստի հանրապետության անվտանգության ամրապնդմանն ու տարածաշրջանային կայունության ապահովմանը։ ԱԳՆ ղեկավարն անդրադարձավ նաեւ Արցախի միջազգային համագործակցության ընդլայնման եւ խորացման միջոցներին։ Այս առնչությամբ արտաքին գործերի նախարարն ընդգծեց Արցախում ներդրումների ներգրավման անհրաժեշտությունը, ինչը կարեւոր նշանակություն ունի երկրի տնտեսության զարգացման համար։ Մասիս Մայիլյանը նշեց Ավստրալիայում Արցախի մասին տեղեկացվածության մակարդակի բարձրացման եւ երկրների միջեւ տարբեր մակարդակներում համագործակցության հաստատման կարեւորությունը։ Հանդիպմանը մասնակցել են նաեւ Արցախի Հանրապետության Ազգային ժողովի պատգամավոր Դավիթ Իշխանյանը, Ավստրալիայում Արցախի Հանրապետության մշտական ներկայացուցիչ Քայլար Միքայելյանը եւ «Հայ դատի» ավստրալական գրասենյակի գործադիր տնօրեն Հայկ Կայսերյանը։