Հիմա համոզվեցիք, որ ոչ թե անտառն են ուզում փրկել, այլ ուզում են միայն իրենք «փետի գործ» անեն

Իջեւանում տեղի ունեցած աղմուկ-աղաղակի ընթացքում միտումնավոր չլսվեց հիմնական բողոքի ձայնը՝ ինչու ոմանք պետք է անտառը կտրեն, իսկ մենք՝ ոչ: Իշխանությունների հետ ջերմ հարաբերություններ ունեցող լրատվամիջոցները իրավիճակը ներկայացրին այնպես, թե իբր իշխանությունները՝ Նիկոլ Փաշինյանի գլխավորությամբ ուզում են վերացնել անտառահատումները, իսկ ցուցարարները դեմ են դրան:

Իրականում բողոքի գործողության մասնակիցներն ընդամենը ուզում էին հասկանալ, թե ինչո՞ւ պետք է արտոնյալներն իրավունք ունենան անտառահատումներ անել, իսկ իրենք՝ ոչ:

Տեղի ունեցավ այն, ինչ ամիսներ առաջ Ազատության հրապարակի հարակից սրճարանների հետ: Ժողովրդին ներկայացրին, թե իբր սրճարաններն ապամոնտաժվում են, վերականգնում յոթանասունականների պատկերը, բայց իրականում ապամոնտաժեցին երկու ամենափոքր սրճարանները, որ մյուսների գործերն ավելի լավ ընթանան:

Հիմա ո՞վ է հիշում սրճարանների պատմությունը՝ կասեր Հիտլերը, եթե ապրեր մեր օրերում եւ Երեւանում: Իսկապես՝ ո՞վ է հիշում: Միայն մի քանիսը: Ո՞ւր են իրենց ճղողները, որ ուզում էին Հայկոյի ոտքերի տակն ընկնել սրճարաններն ապամոնտաժելու համար եւ գոռում էին, թե կեցցե այն իշխանությունները, որ վերականգնում են կանաչ տարածքները:

Ազատության հրապարակը, ինչպես նախկինում, այսօր էլ շրջափակված է սրճարաններով: Անտառն այսօր էլ կտրում են: Նայեք լուսանկարը, որ արվել է հենց այն օրը, երբ Իջեւանում բողոքի գործողություններ էին: Ոստիկանությունն ասում է, թե ավտոմեքենան ուներ բոլոր անհրաժեշտ փաստաթղթերը:

Հիմա հասկացա՞ք, թե իրականում ինչ է կատարվում: Հասկացա՞ք, որ խոսքը ոչ թե ծառահատումներն ընդհանրապես արգելելու, այլ այն մենաշնորհային դարձնելու մասին է: Խեղճերին, թույլերին հանում են, որ իշխանությունների բարեհաճությունն ունեցողները հսկայական շահույթ եւ մենաշնորհ ստանան:

Այնպես որ, մի փորձեք այլ իրականություն ներկայացնել: Հայաստանը փոքր երկիր է, եւ այստեղ սուտը անգամ երեք օրվա կյանք չունի: 

Վարդան Մխիթարյան

Top-News.am