Սևանի ջրի մակարդակը 1 սմ-ով ավելի ցածր է նախորդ տարվա ցուցանիշից․ նախարար

Սևանի ավազանում ջրի մակարդակը 45-54 սմ տատանում է ունենում տարվա ընթացքում՝ ամենացածր մակարդակից մինչև ամենաբարձր մակարդակը։ Նույն իրավիճակն է նաև այս տարի։ Այս մասին Ազգային ժողովում այսօր հայտարարեց շրջակա միջավայրի նախարար Էրիկ Գրիգորյանը։

Նրա խոսքով, սակայն, Սևանի ջրի մակարդակը նախորդ տարվա նույն օրվա համեմատությամբ այսօր 1 սմ-ով ավելի ցածր է։ Նախարարը բացատրեց, որ նախորդ օրերին հավասար էր, բայց հիմա նվազել է։

Ինչ վերաբերում է ամառային սեզոնին հնարավոր ջրառին, նախարարը նշեց, որ հաշվի առնելով ջրամբարների լցվածությունը և այլն՝ կարծում է, որ այս տարի լրացուցիչ ջրառի կարիք չի լինի։ Գրիգորյանի խոսքով՝ իրենք նույնիսկ առաջարկել են, որ 170 միլիոն խորանարդ մետրի փոխարեն, որ օրենքով սահմանված շեմն է, վերցվի 135 միլիոն խորանարդ մետր ջուր։