Ամեն բան վերահսկվում է. Դավիթ Բաբայան

Արցախում և Հայաստանում տոնական միջոցառումների մեկնարկը տրված է: Տրամադրությունը տոնական է, ու այս ամենակարևոր տոնին զգոն են հատկապես սահմանում կանգնած տղաները: Այս մասին մեզ հետ զրույցում ասաց Արցախի նախագահի խորհրդական Դավիթ Բաբայանը:

Զինվորների առօրյան ևս տոնական կլինի, բայց սահմանում զգոնության ամենաբարձր մակարդակ է հայտարարված.

«Ամեն բան վերահսկվում է: Իրադրության իմաստով փոփոխություններ չկան: Բայց ցանկացած պահի Ադրբեջանն իրավիճակը կարող է փոխել: Մենք այդ փոփոխություններին միշտ պիտի պատրաստ լինենք»,- տոնական քայլերթից առաջ սահմանից մեզ հայտնեց Դավիթ Բաբայանը:

Դավիթ Բաբայանը մեզ հետ զրույցում անդրադարձավ նաև նախօրեին ՀՀ վարչապետի՝ Արցախի խնդրի կարգավորման մասով արված մի քանի հայտարարությունների:

«Արցախի ժողովուրդը վաղուց է ասել ու շարունակում է ասել՝ վերադարձ անցյալին չի լինելու, Արցախը երբեք Ադրբեջանի մաս չի կարող լինել»,- ասաց Բաբայանը:

Նա նշեց, որ համազգային նշանակության մի քանի հարցերով, այդ թվում ԼՂ խնդրի կարգավորման, պետք է մշակվի ազգային օրակարգ, որը կներառվի ազգային անվտանգության հայեցակարգում: