Գնային եւ ֆինանսական կայունությունը երկրի տնտեսական զարգացման հիմնական նախապայմաններն են․ ԿԲ

Գնային եւ ֆինանսական կայունությունը երկրի տնտեսական զարգացման հիմնական նախապայմաններն են։ Այս մասին ՀՀ Ազգային ժողովում «Սպառողական վարկավորման մասին» օրենքում փոփոխություններ կատարելու նախագծին վերաբերող քննարկումների ժամանակ հայտարարել է Կենտրոնական բանկի փոխնախագահ Ներսես Երիցյանը՝ պատասխանելով «Իմ քայլը» խմբակցության պատգամավոր Եղիշե Սողոմոնյանի հարցին։ Սողոմոնյանը, մասնավորապես, ԿԲ-ի ներկայացուցչին խնդրել է պարզաբանել Հանրային հեռուստատեսության լրատվական հաղորդումների տնօրեն Պետրոս Ղազարյանի այն հայտարարությունը, թե ԿԲ-ի քաղաքականությունը չի նպաստում տնտեսության զարգացմանը եւ ուղղված է միայն գների կայունության ապահովմանը, որը կարգավորվում է օրենսդրությամբ, ինչպես նաեւ՝ բանկային համակարգին։

Երիցյանը նշել է, որ իրենք բազմիցս պատասխանել են այդ մեղադրանքներին եւ տվել են իրենց դիրքորոշման համապատասխան հիմնավորումը։ Նա ընդգծել է, որ Հայաստանում յուրաքանչյուրը կարող է ունենալ իր դիրքորոշումը այդ հարցի վերաբերյալ, եւ բոլորին համոզել իրենք չեն կարող։ «Ինչպես կարող ենք մենք համոզել, եթե նրանք չեն կարող համաձայնել եւ ընդունել կոնկրետ փաստի առկայությունը եւ համապատասխան վերլուծություն կատարել»,- տարակուսեց Երիցյանը։