«Ինչու՞ են վրացու ընկերները հայեր»․ ինչպես են ընկերացել Սոսո Պավլիաշվիլին եւ Գարիկ Մարտիրոսյանը

«Այնպիսի տպավորություն է, ասես ողջ կյանքս ճանաչել եմ նրան», - ասել է երգիչ, կոմպոզիտոր Սոսո Պավլիաշվիլին НТВ հեռուստաընկերության «Секрет на миллион» հաղորդման ժամանակ։ Նույն կարծիքին է նաեւ շոումեն Գարիկ Մարտիրոսյանը, որը նույնպես հյուրընկալվել է ծրագրում եւ հումորային կերպով ներկայացրել է իրենց ծանոթության պատմությունը։ «Դա այնքան վաղուց էր, որ ես արդեն չեմ հիշում, թե ինչպես է դա եղել, ուր էինք գնացել, ինչի մասին ենք զրուցել, - ասել է նա։ - Եվ այն պահը, երբ ես ներկայացա․ «Գարիկ», իսկ Սոսոն ինձ․ «Իոսիֆ Ռամինովիչ։ Ծնկի իջիր, երիտասարդ», ես չեմ հիշում․․․

Սակայն հիշում եմ, երբ 1999թ․-ին ՈւՀԱ էինք խաղում եւ Սոսոն եկավ ետնաբեմ։ Նա սպիտակ կոստյումով էր․ շշմելու տղամարդ, որը երեւում էր հեռվից։ Սոսոն քայլում էր Մոսկվայի փողոցներով եւ երեւում էր, որ նա է քայլում։ Նա մոտեցավ, մեզ շնորհավորեց, իսկ մենք մտածում էինք, ինքը Սոսոն անձամբ մոտեցավ մեզ։ Եթե չլիներ նրա հումորը այս ընկերական մտերմությունը հնարավոր չէր լինի։ Նա կենսուրախ եւ սրամիտ մարդ է։ Մենք՝ պրոֆեսիոնալ հումորիստներս, ծափահարում ենք քեզ»․․․

Հաղորդավար Լերա Կուդրյավցեւայի այն հարցին, թե ինչպես ենՍոսոյի տանն անցնում հավաքույթները Մարտիրոսյանը պատասխանեց, որ խորովածի եւ գինու թեման շատ ստերեոտիպ է։ Նրա խոսքերով բոլորը հավաքվում են սպիտակ ռոյալի շուրջ, «որի դիմաց Սոսոն հիանալի երգեր է գրում»․․․ «Իսկ, ահա երբ հաղթեց մեր սիրելի ֆուտբոլային թիմը մենք Սոսոյի հետ կարծեմ կոնյակ խմեցինք․․․ Ես «Մանչեսթերին» եմ երկրպագում, սակայն երբ Սոսոյին հյուր եմ գնում երկրպագում եմ «Բարսելոնային»»։

«Իսկ ինչու՞ վրացի լինելով ընկերներդ հայեր են», - հետաքրքրվել է Կուրյավցեւան Սոսոյից։ «Աստված բոլորին փորձություններ է տալիս։ Ես էլ անցնում եմ դրանց միջով», - կատակել է Պավլիաշվիլին։

Սոսոյի կինը՝ Իրինան պատմել է, որ Գարիկի եւ Սոսոյի ընդհանրությունը երաժշտությունն է, եւ որ Մարտիրոսյանը համեստություն է անում, երբ ասում է, որ նա ոչ պրոֆեսիոնալ երաժիշտ է։ «Նա նստում է դաշնամուրի առջեւ եւ նվագում է Սթիվի Ուոսնդերի բարդ ստեղծագործություններից» , -ասել է Իրինան։ Մի խոսքով, դիտում ենք․․․