Իտալիայում «Կանանց կղզին» վաճառվում է 1 միլիոն եվրոյով

Սիցիլիայի ափից ընդամենը 300 մետր հեռավորությամբ գտնվող Isola delle Femmine-ը կամ «Կանանց կղզին» վաճառվում է 1 մլն եվրո գնով, հայտնում է Travel and Leisure-ը:

Սա գեղատեսիլ աթոլ է, մասնավոր կղզի, որը գտնվում է Պալերմոյից ոչ հեռու: Կղզին նախապես արժեր 3,5 մլն եվրո, բայց հաշվի առնելով, որ այն ոչ ոքի չի հետաքրքրել, տերերը գինը զգալիորեն իջեցրել են: Տարածքը ներդրումներ է պահանջում, քանի որ այն ամենը, ինչ կղզու վրա կա՝ XVII դարի կիսաքանդված քարե աշտարակն է:

Կղզին իր լեգենդն ունի: Կղզուն արտասովոր անունը տվել է պատմությունն այն մասին, որ 13 թրքուհի իրենց ընտանիքներից վտարվել են, հայտնվել կղզում եւ այնտեղ ապրել երկար ու երջանիկ:

Դրանից բացի, կղզին հայտնի է որպես դայվինգի վայր: