Սկանդալային պատմությունը մոտենում է ավարտին․ Վրացական հայտնի բանկերից մեկի հիմնադիրը հեռանում է

Վրաստանում TBC բանկի շուրջ ծավալված սկանդալը շարունակվում է: TBC բանկի հիմնադիր և խորհրդի ղեկավար Մամուկա Խազարաձեն սոցցանցի միջոցով հայտարարություն է տարածել բանկից հեռանալու մասին:

 Ստորև ներկայացնում ենք մի հատված նրա տարածած հայտարարությունից.

«Առաջին հերթին շնորհակալություն եմ հայտնել 27 տարվա ընկերության, աջակցության և համատեղ աշխատանքի համար: Կյանքում գալիս է մի փուլ, երբ կարևոր որոշումներ ես ընդունում: Ես նման շատ պահեր եմ ունեցել, և հիմա էլ նույն իրավիճակն է:

Բանկային մեր թիմը հարձակումների է ենթարկվում, ինչի հետևանքով մեր միջազգային բաժնետերերը մեկ ամսում 200 միլիոն լարիի վնաս են կրել, հետևաբար, նաև մեր երկիրն է լրջորեն տուժել: Առանց որևէ հետաքննության և դատարանի որոշման մեր հեղինակությանը լուրջ վնաս են հասցրել` գումարների լվացման անհեթեթ գործում կապ ունենալու համար, ինչը հերքվել է միջազգային մակարդակով:

Ցավոք, որևէ պետական պաշտոնյա, ներառյալ վարչապետն ու նախարարները, ցանկություն չեն հայտնել հանդիպել և անձամբ հետաքրքրվել այս կարևորագույն գործով, չնայած նրանցից մի քանիսին անձամբ եմ գրել և համապատասխան փաստաթղթեր ուղարկել՝ ծանոթանալու համար: Պատասխան ոչ մեկից չեմ ստացել: Փոխարենը նրանց շատերի մեկնաբանություններն եմ լսել հանրային տարածքում:

Հասկացա, որ նպատակն ինձ վարկաբեկելն էր: Հասկացա նաև, որ այստեղ` մեր երկրում, պայքարում են հաջողության դեմ, հասկացա, որ կազմակերպության աճը Վրաստանում սահմանաչափ պետք է ունենա: Ինձ վրա նման հարձակումներն անդրադառնում են նաև բանկի հեղինակության վրա:

Այսօր Լոնդոնում բանկի խորհուրդը որոշում է կայացրել Կենտրոնական բանկի հետ իրավական վեճը դադարեցնելու վերաբերյալ՝ միայն և միայն բանկի, բաժնետերերի և վարկառուների շահերից ելնելով:

Հետևաբար, որոշում եմ կայացրել հեռանալ բանկից, որտեղ անց եմ կացրել կյանքիս 27 տարիները, բանկից, որը 500 դոլարով թիմիս հետ դարձրել եմ տարածաշրջանի խոշորագույն խաղացողներից մեկը:Հույս ունեմ, այս որոշումը դրական կանդրադառնա բանկի հետագա կայունության ու խաղաղ միջավայրի զարգացման վրա։ Իմ ամբողջ էներգիան կներդնեմ մեր երկրի համար կարևորագույն` Անակլիայի ծրագրի իրագործման մեջ: Հույս ունեմ կկարողանամ գործն ավարտին հասցնել»:

 Վրաստանի Ազգային բանկը ողջունել է Խազարաձեի որոշումն առ այն, որ բանկի հիմնադրամի բաժնետերերը ներկայացված չեն լինի «TBC Bank»-ի վերահսկիչ խորհրդում:

Խազարաձեի հայտարարությունից հետո Լոնդոնի ֆոնդային բորսայում «TBC Bank» – ի բաժնետոմսերի գինը սկսել է աճել: Հակառակ երևույթն էր արձանագրվում բանկի հետ կապված սկանդալային պատմության ողջ ընթացքում:

Հիշեցնենք, որ 2018թ-ից փողերի լվացման մեղադրանքով քրեական գործ էր հարուցվել բանկի հիմնադիր և խորհրդի ղեկավար Մամուկա Խազարաձեի ու նրա տեղակալի նկատմամբ: