Գիտնականները պաշտոնապես նոր անվանում են տվել կիլոգրամին

Կիլոգրամը, ամպերը, կելվինը և մոլը ստացել են նոր, ավելի ճշգրիտ ֆիզիկական սահմանումներ, որոնք արտահայտվում են ոչ թե իրական աշխարհի օբյեկտների, այլ վերացական մաթեմատիկական հաստատունների միջոցով՝ տեղեկացնում է Chemistry World-ը:

«Մեզ համար սա նշանակալից օր է․ ամբողջ չափագիտական համայնքը վերջին 30 տարիների ընթացքում շարժվում է դեպի այդ նպատակը: Այժմ մենք կարող ենք վերջապես այլ խնդիրներով զբաղվել և նոր չափագիտական հետազոտություններ սկսել։ Մեր հաջորդ նպատակը ատոմային ժամացույցի օգտագործման շնորհիվ վայրկյանը նորովի սահմանելն է», – ասել է Մեծ Բրիտանիայի Ազգային չափագիտության ինստիտուտի ղեկավար Ժան-Թեոդոր Յանսենը:

Կիլոգրամն առաջին անգամ պատրաստել են դեռ 1889 թ., այս ողջ ընթացքում այն պահվում է Փարիզի Չափերի և կշռի միջազգային բյուրոյում (BIPM): Սակայն, ինչպես հայտնաբերել են գիտնականները, նրա զանգվածը աստիճանաբար նվազել է:

Այդ պատճառով էլ 2005 թվականին, BIPM-ի առաջարկությամբ, սկսվեց չափման հիմնական միավորների նոր սահմանումների մշակումը: 2011-ին գիտնականները որոշեցին զարգացնել զանգվածի մաթեմատիկական ստանդարտը՝ հիմնվելով Պլանկի հաստատունի վրա, որը մասնիկի էներգիան կապում է նրա տատանումների հաճախականության հետ, և Էյնշտեյնի հայտնի E = mc2 բանաձևի վրա:

Անցյալ տարվա կեսերին ավարտվեց փորձերի արդյունքների վերաբերյալ համաձայնությունը, իսկ «կիլոգրամ» հասկացության վերաձևակերպման հարցը քվեարկության դրվեց BIPM-ի գիտական փորձագետների հանդիպմանը, որն այժմ տեղի է ունենում Վերսալում: Համաժողովի բոլոր 60 մասնակիցները քվեարկել են զանգվածային միավորի նոր մաթեմատիկական գաղափարի, ինչպես նաև մյուս երեք ստանդարտների օգտին:

Պլատինե սկավառակը պաշտոնապես կդադարի գործել2019 թվականի մայիսի 20-ին՝ Չափագիտության համաշխարհայի օրը: