Գյուղացիները եւ վարկային տույժ-տուգանքները

Այստ տարի առաջին կարկտահարությունը եղել է մայիսի 8-ին, տուժել են Արմավիրի, Արագածոտնի եւ Արարատի մարզի համայնքները, ընդհանուր վնասված տարածքը կազմել է մոտ 350 հեկտար, եւ վնասի չափը 20-80 տոկոս է կազմել, որոշ տեղերում՝ 50-90 տոկոս: Այս մասին, այսօր՝ մայիսի 17-ին, կառավարության նիստում հայտարարեց Գյուղատնտեսության նախարար Արթուր Խաչատրյանը:

ՀՀ վարչապետ Նիկոլ Փաշինյանի հարցին, թե ե՞րբ կունենանք վնասի ֆինանսական գնահատականը, նախարարն արձագանքեց, որ մեկ շաբաթից:

Փաշինյանը նշեց հետեւյալը. «Մենք կարող ենք արձանագրել, որ հակակարկտային էֆեկտիվ սիստեմ այսօր Հայաստանում չունենք, եւ սա լուրջ պրոբլեմ է: Երկար ժամանակ ասվում էր, որ այս ոլորտում լուրջ փոփոխություններ պետք է տեղի ունենան, բայց այդ փոփոխությունները չեն եղել, եւ պետք է հասկանալ, թե ինչն է պատճառը, որ գյուղացիական տնտեսությունները լայնածավալ կերպով չեն օգտվում հակակարկտային ցանցեր օգտվելու հնարավորությունից:

Կարելի է կռահել, որ պատճառները ֆինանսական են, մենք լրջագույն խնդիր ունենք գյուղատնտեսական վարկերի հետ, քանի որ գյուղացիների վրա հսկայական վարկային բեռ կա, որն ավելի է ծանրացել տույժ-տուգանքներով»,- ասաց Նիկոլ Փաշինյանը:

Նա տեղեկացրեց, որ այդ հարցով երեկ քննարկում է ունեցել Կենտրոնական բանկի նախագահի հետ: նա խնդրեց առաջիկայում մեխանիզմներ մշակել, որ գյուղացիներին վարկային տույժ-տուգանքներից ազատեն, եւ որոշակի վարկային պատմության համաներման հարցը քննարկեն, որ մարդիկ վարկեր ստանալու հնարավորություն ունենան:

«Պարո՛ն Ջավադյան, հույս ունեմ, որ ակտիվ համագործակցություն կլինի համակարգող փոխվարչապետի հետ, որ այդ խնդրով կոնկրետ առաջարկներ ստանանք եւ փորձենք իրավիճակը հաղթահարել»,- ասաց Փաշինյանը:

Իր հերթին, գյուղնախարարը նշեց, որ 2015-ին կարկտահարությունից վնասների չափը կազմել է մոտ 8 մլրդ, 2016-ին՝ 33,2 միլիարդ դրամ, 2017-ին՝ 12,2 միլիարդ դրամ. «Կարծում եմ՝ եթե մենք վնասի կանխարգելման քաղաքականություն իրականացնենք, այս խնդրի առաջ չենք կանգնի»:

Վարչապետն էլ նկատեց, որ պետք է հակակարկտային ցանցերը լայնորեն կիրառվեն, նաեւ կոչ արեց մտածել հակակարկտային ցանցերի արտադրությունը ժամ առաջ սկսելու ուղղությամբ:

Լուրեր Հայաստանից - NEWS.am