Հնդկական ընկերությունը ԱՄՆ-ում $15 մլրդ արժողությամբ պողպատի գործարան կկառուցի 

ԱՄՆ նախագահ Դոնալդ Թրամփը հայտարարել է Այովա նահանգում 15 մլրդ դոլար արժողությամբ խոշոր պողպատի գործարանի կառուցման մասին։ Նախատեսվում է, որ գործարանը կստեղծի առնվազն 1750 մշտական և մինչև 6000 շինարարական աշխատատեղ։

Գործարանը կառուցելու է Mesabi Metallics ընկերությունը, որը պատկանում է հնդկական Essar Group կոնգլոմերատին։ Ընկերության համահիմնադիր Ռավի Ռուիան Թրամփի կողքին ներկա է եղել նախագծի մասին հայտարարությանը։ Նախագիծը նախատեսում է Մինեսոտայի Մեսաբիի երկաթահանքերից ստացված հումքի օգտագործմամբ Այովայում պողպատի արտադրության համալիրի ստեղծում։ Առաջին փուլում գործարանը տարեկան կարտադրի 7.5 մլն տոննա պողպատ, իսկ հետագայում արտադրությունը կարող է հասնել 10 մլն տոննայի։ Արտադրությունը նախատեսվում է սկսել 2030 թվականին։

Թրամփի վարչակազմը նախագիծը ներկայացնում է որպես ԱՄՆ-ում արտադրության և աշխատատեղերի ստեղծման խոշոր ներդրում։ Առևտրի նախարար Հովարդ Լաթնիկը հայտարարել է, որ նախագծի իրականացմանը նպաստել են պողպատի ներկրման նկատմամբ ԱՄՆ-ի սահմանած 50 տոկոս մաքսատուրքերը։

Միաժամանակ, նախագծի վերաբերյալ ուշադրություն է գրավել Essar Group-ի կապը ռուսական էներգետիկ ոլորտի հետ։ Essar-ը 2016 թվականին իր նավթային բիզնեսը՝ Essar Oil-ը, 12.9 մլրդ դոլարով վաճառել է ռուսական Ռոսնեֆտի և այլ ներդրողների մասնակցությամբ կոնսորցիումին։ Ընկերությունը հետագայում վերանվանվել է Nayara Energy, որի բաժնետոմսերի 49 տոկոսը պատկանում է Ռոսնեֆտին։

Nayara Energy-ն 2025 թվականին հայտնվել է Եվրամիության պատժամիջոցների տակ՝ ռուսական նավթից վերամշակված նավթամթերքի արտահանման և դրա ֆինանսավորման սահմանափակումների շրջանակում։ Միաժամանակ Essar Group-ը և Այովայում նախատեսվող պողպատի գործարանի նախագիծը ԱՄՆ-ի կամ ԵՄ-ի պատժամիջոցների տակ չեն։

Al Jazeera-ն նշում է, որ Essar-ի ռուսական կապերը և ԱՄՆ-ում խոշոր ներդրումը ուշադրություն են գրավում այն պայմաններում, երբ Վաշինգտոնը փորձում է տնտեսական ճնշման միջոցով սահմանափակել Ռուսաստանի էներգետիկ եկամուտները։ Սպիտակ տան տվյալներով՝ պողպատի գործարանի առաջին փուլը շինարարության և շահագործման առաջին տասը տարիների ընթացքում կարող է ապահովել շուրջ 95 մլրդ դոլարի տնտեսական ազդեցություն։