Եւ ամեն դեպքում Մադրիդի «Ռեալ» եւ Կրիշտիանու Ռոնալդու

Ֆուտբոլի Չեմպիոնների լիգայի խաղարկության 1/8-րդ եզրափակիչում փետրվարի 14-ին կայացավ եւս երկու հանդիպում: Չեմպիոնների լիգայի ներկայիս գավաթակիր Մադրիդի «Ռեալն» ընդունեց «Պարի Սեն Ժերմենին», իսկ պորտուգալական «Պորտուն»՝ անգլիական «Լիվերպուլին»:

Մադրիդցիները լավ սկսեցին խաղը, գոլ խփելու լավ հնարավորություններ ունեցան, բայց առաջինը գոլ խփեցին հյուրերը: Ռաբիոն 33-րդ րոպեին հաշիվը դարձրեց 1:0: 

Առաջին խաղակեսի վերջին րոպեին Կրոսին վայր գցեցին ՊՍԺ-ի տուգանային հրապարակում եւ մրցավար Ջանլուկա Ռոկին նշանակեց 11 մետրոնոց հարված եւ Ռոնալդուն հաշիվը դարձրեց 1:1:

Երկրորդ խաղակեսում Զիդանը ճիշտ մարտավարություն ընտրեց, ճիշտ ժամանակին խաղադաշտ դուրս բերեց Վասկեսին, Բեյլին եւ Ասենսիոյին, որոնք թարմ շունչ տվեցին մադրիդցիների խաղին: Այս ամենի արդյունքում Ասենսիոյի երկու գոլային փոխանցումներից հետո գոլերի հեղինակ դարձան Ռոնալդուն եւ Մարսելոն:

«Ռեալը» խաղը շահեց 3:1 հաշվով եւ սպասում է մարտի 6-ին կայանալիք պատասխան խաղին:

«Պորտու»-«Լիվերպուլ» հանդիպումն ավարտվեց հյուրերի՝ անգլիական ակումբի բացահայտ առավելությամբ՝ 5:0: Գոլերը խփեցին Մանեն՝ երեք անգամ, Սալահը եւ Ֆիրմինիոն:

Top-News.am