ԵՄ դատախազները դեռ հարցեր ունեն Ուրսուլա ֆոն դեր Լայենի՝ Pfizergate-ի գործով

Եվրոպական հանրային դատախազությունը (EPPO) շարունակում է հետաքննել Եվրահանձնաժողովի նախագահ Ուրսուլա ֆոն դեր Լայենի և Pfizer ընկերության գլխավոր տնօրեն Ալբերտ Բուրլայի միջև COVID-19 պատվաստանյութերի գնման շուրջ բանակցությունները։ POLITICO-ի հաղորդմամբ՝ հետաքննության շրջանակում ֆոն դեր Լայենը դեռ անձամբ ցուցմունք չի տվել դատախազությանը։

2024 թվականին EPPO-ն իր վարույթ է վերցրել Բելգիայում սկսված հետաքննությունը, որն առնչվում է պատվաստանյութերի ձեռքբերման բանակցությունների ընթացքում ենթադրյալ իրավախախտումներին։ Իրավական փաստաթղթերի համաձայն՝ քննվում են պաշտոնեական լիազորություններին միջամտության, SMS հաղորդագրությունների ոչնչացման, կոռուպցիայի և շահերի բախման վերաբերյալ կասկածները։

Եվրահանձնաժողովի ներկայացուցիչ Թոմաս Ռենիեն հայտարարել է, որ կառույցը լայնորեն համագործակցել է դատախազության հետ, իսկ ֆոն դեր Լայենը պատրաստակամ է պատասխանել առկա հարցերին՝ իր պարտականությունների և ժամանակի հնարավորությունների սահմաններում։

EPPO-ի հեռացող գլխավոր դատախազ Լաուրա Կոդրուցա Կյովեշին POLITICO-ին տված հարցազրույցում նշել է, որ որոշ քաղաքական գործիչներ իրենց օրենքից վեր են համարում։ Նա նաև մտահոգություն է հայտնել, որ ֆինանսավորման պակասը, իրավական դաշտի վերանայման ձգձգումները և բյուրոկրատական խոչընդոտները կարող են թուլացնել կառույցի անկախությունն ու արդյունավետությունը։

Կյովեշին, որի յոթնամյա պաշտոնավարումն ավարտվում է ուրբաթ օրը, ընդգծել է, որ դատախազությունը պետք է շարունակի իր աշխատանքը՝ անկախ քաղաքական իրավիճակից և ընտրություններից։