Ֆրանսիայում հարյուրավոր սուպերմարկետներ ենթարկվել են աննախադեպ կիբերհարձակման

Ֆրանսիայում հարյուրավոր սուպերմարկետներ ենթարկվել են աննախադեպ կիբերհարձակման, ինչի հետևանքով խափանվել են սառնարանային համակարգերը՝ պատճառելով միլիոնավոր եվրոների վնաս։ Հաքերային հարձակումից տուժել են երկրի խոշորագույն առևտրային ցանցերը՝ Intermarché-ն, Coopérative U-ն, Netto-ն, Carrefour Market-ը, E.Leclerc-ը և Monoprix-ը։

Չարագործներն օգտագործել են դանիական Danfoss ընկերության ծրագրային ապահովման խոցելիությունը։ Այս ընկերությունը մատակարարում է խանութների սառնարանային կայանների կառավարման համակարգերը։ Հարձակման են ենթարկվել հիմնականում սարքավորումների հին տարբերակները։

Հաքերները միացրել են սառնարանների ավտոմատ հալեցման (տաքացման) ռեժիմը։ Սառեցնելու փոխարեն սառնարաններն ու սառցարանները շուրջ վեց ժամ անընդմեջ տաքացել են՝ հասնելով մինչև 50°C-ի։ Որոշ խանութներում սարքերի գերտաքացումը նույնիսկ հրդեհների պատճառ է դարձել։

Ընդհանուր վնասի չափը դեռ հաշվարկվում է, սակայն այն արդեն հասնում է միլիոնավոր եվրոների (օրինակ՝ միայն Էլզաս նահանգի երկու սուպերմարկետ կորցրել է շուրջ 270,000 եվրո)։

Միջադեպի հետաքննությամբ զբաղվում է Ֆրանսիայի Կիբերանվտանգության ազգային գործակալությունը՝ Փարիզի դատախազության հետ համատեղ։ Ֆրանսիական կողմը համագործակցում է նաև եվրոպական այլ կառույցների հետ, քանի որ համակարգչային նմանատիպ խնդիրներ է արձանագրել նաև նիդերլանդական Ahold Delhaize ընկերությունը։ Թե կոնկրետ ով է կանգնած այս խոշոր հարձակման հետևում, առայժմ հայտնի չէ։