Անեկդոտ Սիսիանի քննչական բաժնից

ՀՀ քննչական կոմիտեի Սյունիքի մարզային քննչական վարչության Սիսիանի քննչական բաժնում քննվող քրեական գործով ձեռնարկված քննչական եւ դատավարական այլ գործողությունների արդյունքում բացահայտվել է «Հայփոստ» ՓԲ ընկերության Սիսիանի տեղամասից կատարված գողությունը. առաջադրվել է մեղադրանք:

Այն, որ գողությունը բացահայտվել է, շատ լավ է, գովելի է նաեւ, որ առաջադրվել է մեղադրանք, բայց ծանոթանալով Սիսիանի քննչական բաժնի տարածած հաղորդագրությանը, մի շարք հարցեր են առաջացել:

Ահա թե ինչ են հայտնում սիսիանցի քննիչները. 

«Դեպքի առթիվ նույն օրը հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 3-րդ կետով և ձեռնարկվել անհետաձգելի քննչական և օպերատիվ-որոնողական գործողություններ՝ կատարված գողության հանգամանքները պարզելու ուղղությամբ: Արդյունքում՝ փաստական տվյալներ են ձեռք բերվել առ այն, որ տեղամասից հափշտակությունը կատարել է Սիսիան քաղաքի բնակիչը՝ ծնված 1977թ., հունվարի 5-ին՝ ժամը 01:50-ի սահմաններում»:

Ըստ այս հաղորդագրության, ստացվում է, որ Սիսիանում բնակվում է ընդամենը մեկ հոգի: Ինչո՞ւ: Հաղորդագրությունում շատ պարզ նշված է՝ հափշտակությունը կատարել է Սիսիան քաղաքի բնակիչը: Եթե չի նշվում նրա անունը, գոնե անվան առաջին տառերը, նշանակում է, որ Սիսիանում ընդամենը մեկ հոգի է ապրում, որն էլ կատարել է գողությունը:

Ավելին, սիսիանցի քննիչները հարկ են համարել մանրամասնորեն նշել, թե երբ է ծնվել հափշտակություն կատարողը, ընդ որում, նշելով ծնվելու ճիշտ ժամը. «... հափշտակությունը կատարել է Սիսիան քաղաքի բնակիչը՝ ծնված 1977թ., հունվարի 5-ին՝ ժամը 01:50-ի սահմաններում»:

Top-News.am