Որևէ քննարկում տեղի չի ունենում. «Tasnim»

Իրանի ուժային կառույցների բարձրաստիճան ներկայացուցիչը «Tasnim» գործակալության հետ զրույցում հերքել է ԱՄՆ նախագահ Դոնալդ Թրամփի հայտարարությունն արդյունավետ բանակցությունների մասին՝ պնդելով, որ իրականում որևէ քննարկում տեղի չի ունենում։

Ըստ իրանական աղբյուրի՝ Թրամփի որոշումը՝ հինգ օրով հետաձգել հարվածները, ոչ թե դիվանագիտական առաջընթացի արդյունք է, այլ «նահանջ»՝ պայմանավորված Իրանի կողմից հնչեցված իրական ռազմական սպառնալիքներով և Արևմուտքի ֆինանսական շուկաների վրա աճող ճնշմամբ։

Իրանցի պաշտոնյան ընդգծել է, որ միջնորդների միջոցով ստացված բոլոր հաղորդագրություններին Թեհրանը տվել է հստակ պատասխան. պաշտպանողական գործողությունները կշարունակվեն մինչև լիակատար զսպման հասնելը։ Իրանական կողմը Թրամփի 5-օրյա վերջնագիրը որակել է որպես «հոգեբանական պատերազմի» մաս և հայտարարել, որ Հորմուզի նեղուցում իրավիճակը չի վերադառնա նախկին հունին, քանի դեռ տարածաշրջանում առկա է պատերազմական վիճակը։ Թեհրանը վերահաստատել է իր պատրաստակամությունը՝ շարունակելու լայնամասշտաբ պաշտպանությունն ու հակահարվածները՝ անկախ Վաշինգտոնի հայտարարած դադարներից։