Էդիտա Գզոյանը իր գիտական գործունեությունը շարունակելու բոլոր հնարավորություններն ունի, այդ թվում՝ Ցեղասպանության թանգարանում. ԿԳՄՍ նախարար
Հայոց ցեղասպանության թանգարան-ինստիտուտի տնօրենի պաշտոնում Էդիտա Գզոյանին վերականգնելու հարց օրակարգում չկա։ «Արմենպրես»-ի փոխանցմամբ՝ լրագրողների հետ զրույցում այս մասին ասել է ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ ներկայացնելով Հայոց ցեղասպանության թանգարան ինստիտուտի աշխատակազմի հետ ունեցած հանդիպման արդյունքները։
Հարցին, թե հանդիպման ընթացքում արդյոք բարձրացվե՞լ է Էդիտա Գզոյանին Ցեղասպանության թանգարան-ինստիտուտի տնօրենի պաշտոնում վերականգնելու հարցը, նախարարը պատասխանել է. «Տնօրենին վերականգնելու հարց չկա»։
Նախարարն ընդգծել է, որ Էդիտա Գզոյանը պաշտոնից ազատվել է կառավարման հետ կապված խնդիրների պատճառով։ «Խնդիրները տարբեր են, մենք առիթ ունեցել ենք միասին շատ երկար ու մանրամասն խոսել բոլոր խնդիրներից, և ես կարծում եմ, որ բոլոր հարցերը ստացել են իրենց պատասխանները։ Ես տիկին Գզոյանին շատ գնահատում եմ՝ որպես գիտնական, գնահատում եմ նրա գործունեությունը և գտնում եմ, որ նա իր գիտական գործունեությունը շարունակելու բոլոր հնարավորություններն ունի, այդ թվում՝ Ցեղասպանության թանգարան-ինստիտուտում։ Այդ իմաստով, կարծում եմ, որ մեր համագործակցությունն ամենևին սպառված չէ, բայց կառավարումը կոնկրետ օղակ է, կառավարումը ենթադրում է կոնկրետ պատասխանատվություններ և կառավարչական խնդիրները պետք է լուծվեն»,- ասել է նախարարը։
Անդրադառնալով դիտարկմանը, թե վարչապետ Նիկոլ Փաշինյանն արդեն հայտարարել է, որ Էդիտա Գզոյանն ազատման դիմում է գրել իր ցուցումով, քանի որ պետական արարողակարգային այցի շրջանակներում Հայոց ցեղասպանության հուշահամալիր այցելած ԱՄՆ փոխնախագահ Ջեյ Դի Վենսին արցախյան հիմնախնդրի վերաբերյալ գիրք նվիրելը հակասում է Հայաստանի արտաքին քաղաքական օրակարգին՝ Ժաննա Անդրեասյանն ասաց.
«Ո՞ւմ կողմից է գիրք նվիրվել։ Տնօրենի կողմից չէ՞։ Հետևաբար, կառավարման խնդիր է, ճիշտ է՞։ Եթե դուք մի բառը կապեք մյուսին, կհասկանաք նաև իմ նկարագրած խնդրի էությունը։ Մենք խոսում ենք ղեկավար անձի կողմից կառավարման հարցի մասին, ինձ համար հարցը սպառված է, որովհետև եղել է իրավիճակ, եղել է իրավիճակ, որը պետք է չլիներ, և այդ իրավիճակը ունեցել է իր հանգուցալուծումը»,- ընդգծել է նախարարը։
Անդրադառնալով Ցեղասպանության թանգարան-ինստիտուտի աշխատակազմի հետ հանդիպմանը՝ Անդրեասյանը հայտնեց, որ աշխատակազմը ցանկություն էր հայտնել իր հետ հանդիպել, ինքն էլ ընդառաջել է, բոլոր ցանկացողները հրավիրել են նախարարություն։
Հանդիպումը կայացել է մարտի 16-ին, անդրադարձ է եղել բոլոր հարցերին, որոնք բարձրաձայնել են թանգարան-ինստիտուտի աշխատակիցները։
«Տարբեր բնույթի հարցեր ունեին՝ հիմնականում կապված իրենց գիտական, հետազոտական գործունեության հետ։ Ես պարզ ու հստակ նրանց ասել եմ, որ իրենք պետք է վերադառնան իրենց բնականոն աշխատանքին, իրականացնեն այն գիտական, հետազոտական նաև թանգարանային գործունեությունը, որը իրականացնում են։
Թանգարանի ֆինանսավորումն ամեն տարի ավելացել է պետության կողմից, և պետությունը երբեք այսչափ աջակցություն չի տրամադրել Ցեղասպանության թանգարան-ինստիտուտին։
Նախարարը խոսել է նաև Ծիծեռնակաբերդի հուշահամալիրում անցկացվող շինարարական աշխատանքների մասին։ Նրա խոսքով՝ շինարարական աշխատանքների հետ կապված եղել են խնդիրներ, որոնք լուծելու համար մեծ ջանքեր են գործադրվել։ Նախարարը հիշեցրել է, որ սեպտեմբերից սկսած՝ ինքն ամեն շաբաթ այցելում է հուշահամալիր, հետևում շինարարական աշխատանքներին։
Ժաննա Անդրեասյանը ցանկություն ունեցող լրատվամիջոցներին հրավիրեց Ծիծեռնակաբերդի հուշահամալիր հերթական այցերից մեկի ընթացքում ուղեկցել իրեն։
ՀՀ վարչապետ Նիկոլ Փաշինյանը մարտի 12-ին հայտնել էր, որ ինքը Ցեղասպանության թանգարան-ինստիտուտի տնօրեն Էդիտա Գզոյանին խնդրել է ազատման դիմում գրել, իսկ պատճառն այն է, որ Էդիտա Գզոյանը ԱՄՆ փոխնախագահ Ջեյ Դի Վենսի՝ Հայոց ցեղասպանության հուշահամալիր արարողակարգային այցի ընթացքում հիշատակել է արցախյան հիմնահարցն ու թեմայի վերաբերյալ գիրք նվիրել։
Ավելի ուշ հայտնի դարձավ, որ Հայոց ցեղասպանության թանգարան-ինստիտուտի հոգաբարձուների խորհրդի որոշմամբ՝ թանգարան-ինստիտուտի տնօրենի ժամանակավոր պաշտոնակատար է նշանակվել Հրաչյա Թաշչյանը։
Վիճակագրություն․ ի՞նչ փոփոխություններ է կրել ՀՀ ապրանքաշրջանառությունը տարբեր երկրների հետ
4 մլրդ դոլարի ներդրում․ Հրազդանում բացվել է Firebird-ի ԱԲ կենտրոնը
ԵԱՏՄ-ի արտոնյալ առևտրային գործընկերների թիվը կավելանա․ անդամ երկրներն առանցքային փաստաթղթեր են ստորա...
Վանաձորի մի շարք հասցեներում գազանջատումներ կլինեն
Հայաստանում ամառային հանգիստը որքանո՞վ է հասանելի միջին ընտանիքին
Երբ Իրանը գալիս է մեր բանակցողների մոտ, նրանք խոսում են միայն կանխիկի մասին. Ուոլց
Հորմուզի նեղուցը չի վերաբացվի, քանի դեռ Վաշինգտոնը չի կատարել Թեհրանի պահանջները
Գեղարքունիքի մարզում կասեցվել է գազավորված ըմպելիքների արտադրամասի գործունեությունը․ ՍԱՏՄ
Գազամատակարարման ընդհատումներ Մասիս քաղաքի մի շարք հասցեներում
Ջրափրկարարները քաղաքացուն անվնաս դուրս են բերել ափ