Աշոտ Արսենյանի «Արփա Էներգիա» ընկերությանը տուգանելեն 1 մլն դրամով

ՀՀ հանրային ծառայությունները կարգավորող հանձնաժողովն իր դեկտեմբերի 20-ի նիստում տուգանել է ԱԺ ՀՀԿ-ական պատգամավոր, «Ջերմուկ» ընկերության սեփականատեր Աշոտ Արսենյանին պատկանող «Արփա-Էներգիա» ընկերությանը:

ՀԾԿՀ համապատասխան որոշման մեջ մասնավորապես, նշվում է, որ «Արփա-Էներգիա» ՍՊԸ-ն 2017 թվականի նոյեմբերի 28-ին դիմել է ՀԾԿՀ՝ հայտնելով, որ «Արփա» փոքր հիդրոէլեկտրակայանի շահագործման ընթացքում պարզվել է, որ նախկինում նախատեսված մետաղական խողովակաշարի փոխարեն տեղակայվել է ապակեմանրաթելային խողովակաշար, որի արդյուքնում Կայանի հաշվարկային ճնշումը 42.2մ-ից դարձել է 47.14մ, իսկ Կայանի հաշվարկային հզորությունը 2622 կՎտ-ից դարձել է 3292 կՎտ, հաշվարկային ելքը մնացել է անփոփոխ:

Ընկերությունը ներկայացրել է հզորության նոր հաշվարկները՝ դրական փորձաքննական եզրակացություններով եւ խնդրել է համապատասխան փոփոխություն կատարել ընկերությանը տրամադրված լիցենզիայի պայմաններում,

Միաժամանակ նշվել է, որ Հանձնաժողովը 2017 թվականի նոյեմբերի 30-ից Ընկերության նկատմամբ հարուցել է վարչական վարույթ՝ Լիցենզիայի պայմանների 6-րդ, 7-րդ եւ 34-րդ կետերի պահանջների խախտման փաստի ուսումնասիրության նպատակով, նաեւ նշվել է, որ Ընկերությունը 2017 թվականի դեկտեմբերի 5-ի գրությամբ հայտնել է, որ խախտումը տեղի է ունեցել չիմացության հետեւանքով, ներկայումս միջոցներ են ձեռնարկում խախտումը վերացնելու ուղղությամբ:

Այս ամենը հաշվի առնելով Հանձնաժողովը որոշել է Ընկերության նկատմամբ կիրառել տուգանք մեկ միլիոն դրամ գումարի չափով: